Akta reklamasoens ba eleisaun Parlamentar nian ne’ebe Partidus Politiku sira hato’o mai iha Comisaun Nasional ba Eleisaun (CNE), agora dadaun submete ona ba iha Ministeriu Publiku (MP) hodi prosesa.
“Ami enkamina hotu tiha ona ba iha Ministeriu Publiku, e Ministeriu Publiku mak hare, karik ida ne’e tenke tesi lia iha Tribunal ga taka deit ona,” hateten Komisariu CNE, Arif Abdulah Sagran via telephone, foin lalais.
Tuir Komisariu Sagran, total akta reklamasoens hirak ne’ebe CNE simu husi fiskais Partidus Politiku sira ne’e hamutuk 20 e tal.
Entertantu Deputadu Natalino dos Santos katak, reklamasasun ne’ebe mak CNRT halo hato’o tiha ona ba iha CNE tuir duni prosedimentu legal.
“Deside atu krimi ka la’e, ne’e kompetensia Tribunal nian,” dehan Deputadu ne’e.
Enkuantu Partidu Klibur Oan Timor As’wain (KOTA), la aprezenta reklamasaun ba iha CNE tanba laiha baze legal.
“Hau la aprezenta tanba sa, primeiru lugar ita atu halo reklamasaun ruma tenke iha materia tanba ami la iha fiscal ida,” dehan Prezidente Partidu KOTA, Manuel Tilman.
Tuir nia, Partidu KOTA la prepara sira nia fiskais hodi kontrola eleisaun tanba sira nia osan laiha atu selu fiskais sira.
