Atu familia kiak sira, liu-liu labarik minoridade sira tinan 17 mai kraik asesu ba edukasaun no servisu publikus hanesan ho ema seluk governu liu husi Ministeriu Solidaridade Social (MSS) tinan ida labarik nain 17.000 resin husi nivel Sukus, Aldeias, Sub-distritu, Distritu to’o Nasional sei hetan bolsa da Mãe tanba sira liu ona selesaun.
“Hau hanoin bolsa da mãe importante tebes atu fo apoiu ba familia kiak liu-liu inan sira ne’ebe kbi’it laek, tau matan ba labarik orfonato sira,” dehan Xefe Departamentu Protesaun Labarik , Florencio Gonzaga, foin lalais iha Kaikoli, Dili.
Nia hatutan, atu tama iha programa bolsa da mãe familia mukit sira tenke deklara atu kumpri tau matan ba oan nia edukasaun no saúde, benefisiu sei selu direitamente ba ema ne’ebe mak tau matan ba labarik liu-liu inan aman sira.
Kona ba atu kontinua ka la’e, rezultadu analiza dadus mak sei determina familia ne’e kontinua hetan asesu ba programa bolsa de mãe ka la’e.
Benefisiariu sira ne’e mai husi oan kiak (inan faluk kbi’it laek ka aman ho kondisaun defisiente) no rendimentu familia la sufsiente.
Iha parte seluk eis-Prezidente Grupu Feto Parlamentar Timor-Leste (GMPTL), Josefa Alvares Soares dehan, programa bolsa da Mãe ne’e diak maibe dala barak nia implementasaun mak seidauk diak tanba iha familia vuneravel balun mak la bele asesu ba programa ne’e liu –liu sira area rurais sira tanba falta informasaun.
“Hau hanoin programa ida ne’e hahu governu anterior kedas hahu ona to’o agora tanba programa social ne’ebe ita hare liu ba ema ne’ebe vuneralvel entau importante tebes hau espera katak programa ida ne’e sei bele kontinua nafatin”, Deputada ne’e esperansa.
Tuir Deputada ne’e, atu labele mosu problema ekipa identifikasaun dadus familia vulneravel sira mos tenke hetan konfiansa husi governu rasik no tenke iha kordenasaun ho autoridade local sira, nune’e bele hetan dadus familia ne’ebe presiza duni tulun.
