Judicial System Monitoring Program (JSMP), husu ba Parlamentu Nasional (PN) foun atu altera tiha Lei Pensaun Vitalisia tanba lei ne’e la fo benefisiu ne’ebe maka justu ba Timor oan, no halo debate lalais lei reparasaun ba vitima 1975-1999.
“Lei Pensaun Vitalisia ne’e preokupa ema hotu nia hanoin, tanba ne’e la justu iha kontesstu nasaun ida ne’ebe maka foin harii, e kona ba lei reparasaun, iha momentu ne’eba tama ona aprovasaun jeneralidade maibe wainhira tama iha diskusaun espesial la hetan korum ne’e duni PN foun tenke tau prioridade ba kestaun ne’e,” sujere Diretor Ezekutivu JSMP, Luis de Oliveira Sampaio, (23/07), iha Colmera, Dili.
Tuir nia, wainhira atu diskuti kona ba lei hirak ne’e tenke iha estudu ne’ebe maka kle’an no halo mos monitorizasaun ba nasaun sira seluk, atu nune’e lei ne’e wainhira produs iha nia kredibiliade nune’e komunidade sira konkorda no implementa.
Entertantu Deputadu Manuel Tilman, konkorda ho sujestaun ida ne’e, atu Parlamentu foun tenke diskuti duni lei hirak ne’e.
“Lei reparasaun ba vitima no instituto Memoria ba vitima masakre 1975 no 1999, ne’e uluk pendente hela no agora zero tiha fali, ne’e duni servisu prioridade ba PN foun atu bele diskuti lei ne’e,” dehan Deputadu Tilman.
Nia dehan, lei pensaun vitalisia mos presiza atu altera tanba komunidade barak mak la konkorda, ne’e duni Parlamentu Nasional foun tenki hare mos kona ba asuntu ida ne’e.
