“Bainhira partus o labele hakilar maka’as maske moras, se o hakilar parteira sira hirus o no koalia o, hau mos uluk ba primeiru hau hakilar maka’as, sira siak hau, sorte diak ita hetan parteira ne’ebe pasensia ne’e diak sira bele ajuda ita ho kalma,” dehan Komunidade mos nudar inan Juandina da Silva, bainhira dada lia ho nia prima iha Comoro, Dili, (24/07).
Inan ne’e dehan, ida ne’e la’os ema ida nian preokupasaun maibe ema hotu nian liu-liu inan feto sira ne’ebe halo partus iha fasilidade saude sempre hetan maltrata husi parteiras sira.
Iha parte seluk Diretor Nasional Rekursu Humanu Ministerio Saúde (DNRH-MS), Duarte Ximenes hateten durante ne’e sira liu husi Institutu Nasional da Saúde (INS) fo formasaun nafatin atu hadia skill parteiras sira nian hanesan safe motherhood, imunizasaun nutrisaun no seluk tan.
“Atu rezolve didiak ita nia problema servisu saúde ne’e la sufsente deit bainhira ita haruka ema ba tuir formasaun, tanba nia ba liur hatene teoria mai fali iha ne’e nia tenke servisu tuir ambiente iha ne’e nian ho ida ne’e ita mos tenke dezenvolve formasaun iha ne’e ita iha ona instituisaun,” dehan Diretor Ximenes.
Diretor ne’e mos rekonese katak, la’os deit atetudi husi parteira sira, maibe mos pesoal saúde hotu ne’ebe fo atendimentu ladun responde ba populasaun nia moras no la ho profesionalismu.
Tuir nia, ida ne’e sai kestaun importante ne’ebe ministerio tenke buka dalan atu hadia ida ne’e maibe antes atu fo formasaun foun tenke identifika uluk komportamentu ne’ebe presiza hadia no kauza husi hamosu atetude la responde ba pasiente ne’e hanesan salario, supervisaun ba servisu no seluk tan bele mos sai impaktu.
Nia informa katak atu fo formasaun ne’ebe kualidade ba pesoal saúde sira tenke iha planu no modul ne’ebe diak inklui mos prepara instituisaun ne’ebe kualidade nune’e bele fo formasaun ne’ebe responde duni ba problema sira ne’e.
