Governu Timor-Leste servisu hamutuk ho Governu Australia liu husi AUSAID no Ajensia Banku Dezenvolvimentu (ADB) haruka tan bolseirus hamutuk nain 17 funsiunariu husi Ministeriu Infrastrutura (MI) nian ba eskola iha Universidade Indonesia hodi hasai mestradu.
“Tinan rua liu ba ita halo ona lansamentu primeira grupu iha Ministeriu Infrastrutura, ohin ita hamutuk fali programa Dezenvolvimentu ba segunda Grupu hamutuk ema nain 17,” hateten Ministru Infrastrutura Pedro Lay da Silva iha Dili.
Tuir Ministro Lay, programa bolsu estudu ba ministeriu ida ne’e hetan susesu tanba hetan apoiu husi parseiru dezenvolvimentu AusAid no ADB.
“Hau fo agradese ba AUSAID no ADB ne’ebe apoiu ona ba programa ida ne’e,” Ministru Lay agradese.
Bolseirus 17 ne’e sei hasai mestradu kona ba Engeneiru Tekniku ninian, Manajementu Operasaun Maritima , Aviasaun nian, Planu Urbanizasaun, Informasaun Teknolojia, Engeneiru Eletrisidade, Finansa Admistrasaun no seluk tan.
Entertantu Embaixador Australia ba Timor-Leste, Miles Armitage, hato’o parabens ba bolseirus sira tanba bolsu estudu ne’e fo benefisiu ba bolseiru ida-idak e ida ne’e sai hanesan asset importante ba dezenvolvimentu Timor-Leste nian.
“Hau fo parabens ba imi hotu nia atinjimentu liu-liu ba bolseiru hirak ne’ebe maka atu ba estuda, hau hein katak, bainhira bolseiru hirak ne’e kompleta ona sira nia estudu bele fila mai konstribui ba dezenvolvimentu Timor-Leste,” esperansa Embaixador Australia Armitage.
Embaixador Armitage mos hato’o agradese ba ADB no Ministeriu Infrastrutura ne’ebe esforsu ona hodi halo selesaun ba kandidatu bolsu estudu ho susesu.
Enkuantu total orsamentu ne’ebe Governu Australia liu husi sira nia Ajensia Ausaid fornese programa ne’e ho montanteUS$ 12 miliaun, inklui mos kontribuisaun husi ADB hamutuk US$3 miliaun.
