Projeitu rehabilitasaun estrada Fatuahi nian ne’ebe halo iha tinan kotuk, obra ne’e sei remata iha tinan ida ne’e.
“Lolos ne’e remata ona iha fulan rua kotuk, maibe tanba dezaste naturais ne’ebe foin lalais akontese, entaun halo fali e hau labele temi fulan maibe tinan ida ne’e sei remata,” dehan Engenering Estrada Sekretariu Estadu Obras Publika (SEOP), Jose Agusto iha Mandarin, Dili.
Tuir nia,projeitu rehabilitasaun ba estrada ne’e, SEOP servisu hamutuk ho Kompania JICA husi Japaun hodi kaer obra ne’e.
“Agora dadaun rehabilitasaun lao hela,orsamentu ita nian maibe tekniku husi JICA,”Engenering Estrada ne’e tenik.
Hadia ka halo foun estrada iha teritoriu tomak, ne’e servisu Sekretariu Estadu Obras Publika nian, tanba Parlamentu Nasional kada tinan sempre aprova orsamentu ba estrada nian.
“Hau hanoin ne’e kapas tanba estrada ne’e kleur ona aat maibe agora dadaun hadia ona ne’e diak,” dehan Deputadu Joaquin Amaral.
Deputadu ne’e mos sujere ba Governu atu tau papan ida, no hakerek projeitu ne’e hadia bainhira maka remata, no tau mos servisu hamutuk ho kompania ida ne’ebe, ne’e para ema bele hatene.
