Trabalhadora Domestika ka domestic worker barak mak agora dadaun halo servisu laiha kontratu, maibe uza sistema bolu malu deit, tanba ne’e barak mos simu salariu la tuir estandar ne’ebe governu determina.
“Ami iha foho ne’e ema bolu ami atu ba hare sira nia oan ka fase sira nia roupa, ami ba deit ona maske salariu ne’ebe sira fo ne’e oituan los,” hateten Domestic Worker husi Distritu Oe-Cusse, Luisa Elu, bainhira partisipa iha dialogu sosial entre sosiedade sivil ho governu kona ba domestic worker, (18/07), iha Hotel Timor, Dili.
Tuir nia, durante ne’e sira simu deit osan hira mak sira nia patraun fo maske minimu liu, tanba situasaun ekonomia uma laran obriga.
Trabalhadora ne’ebe sei tur iha banku eskola Sekundaria iha terseira klase ne’e dehan, sira lahatene informasaun kona ba lei kodigu laboral foun ne’ebe foin dadauk governu liu husi Sekretariu Estadu Formasaun Profesional e Empregu (SEFOPE) lansa ne’e.
Tanba ne’e nia sente kontente ho seminariu ida ne’e, tanba ajuda ona hodi aumenta sira nia konesementu kona ba sira nia direitu no dever.
“Durante ne’e hau halo servisu rangkap hare oan, fase roupa no tein, depois selu ami 20 dolar deit,mais agora hau hatene ona, katak ami nia salariu fulan ida ami simu 115 dolar, kuandu patraun la selu tuir ida ne’e, hau sai,” dehan Domestic Worker ne’e.
Enkuantu Trabalhadora Domestika husi Distritu Oe-Cusse, Sabina Ase konta, nia rasik sai servidor iha uma laran desde 2007 to’a agora maibe salariu ne’ebe nia simu minimu liu kompara ho saida mak governu determina.
“Kada fulan hau simu deit 15 to’o 30 dolar deit, e servisu ne’ebe hau halo ne’e barak liu fali salariu ne’ebe hau simu, mais hau kontinua servisu ida ne’e tanba hau presiza tebes osan,” hateten Domestic Worker ne’e.
Tuir nia, ida ne’e akontese karik tanba patraun ne’ebe nia servisu ba ne’e falta de informasaun kona ba lei foun ne’ebe iha, tanba ne’e husu ba SEFOPE atu halo sosializasaun ba lei ne’e ho patraun sira hotu ne’ebe fo servisu ba ema.
Entretantu Partisipante husi Distritu Baucau, Angelina Soares kontente tebes ho informasaun ne’ebe sira hetan iha seminariu ida ne’e, liu-liu kona ba lei kodigu laboral foun
“Hau kontente nune’e bainhira hau hetan servisu karik, hau hatene ona hau nia direitu,” dehan feto foinsa’e ne’e ho kontente.
Nia mos espera katak patraun sira ne’ebe fo servisu ba ema sira, atu selu sira nia staf tuir salariu determina ona husi SEFOPE.
