Serimonia tomada de pose ba Membru Parlamentu foun sei hala’o iha loron 30 Julhu fulan ne’e, tanba ne’e husu ba Comisaun Nasional ba Eleisaun (CNE) atu aselera prosesu apuramentu ba rezultadu eleisaun parlamentar nian, nune’e bele halo preparasaun.
“Iha dia 30 Julhu halo tomada de pose ba deputadu foun ba terseira lejislatura nian, e ita hein katak, kontajen prosesu hotu-hotu eleisaun ninian bele remata lalais ona,” hateten Deputadu Aderito Hugo, iha Uma Fukun, Dili.
Enkuantu tuir Deputadu husi Bankada Congresu Nasional Rekonstrusaun Timor (CNRT) ne’e katak, mandatu ba segundu lejislatura nian sei remata iha loron 30 Julhu ne’e.
Iha fatin hanesan Deputadu husi Bankada Partidu Sosial Demokrata (PSD), Mario Viegas Carascalao hateten, fulan Julhu besik remata ona maibe seidauk iha preparasaun husi Parlamentu rasik.
“Mais tomada depose depois de Tribunal Rekursu halo tiha deklarasaun ba legal, legaliza tiha rezultadu ne’e depois Prezidenti da Republika mos tenke iha ne’e,” Deputadu Carrascalao tenik.
Alende ne’e Deputadu ne’e mos husu ba Deputadu Segundu Lejislatura nian, atu prepara aan hodi entrega patrimonio parlamentu nian ba Deputadu foun terseira lejislatura nian.
