Problema ne’e akontese iha Suku Leorema, Distritu Liquisa iha dia 01 de Outubru 2011. Vitima FS konsidera hahalok ida ne’ebe arguidu ho inisial JD halo ba nia ne’e krimi, vitima halai ba nia inan-aman no familia vitima hato’o keixa ba iha Polisia.
“Iha kalan tuku 11, hau hetan telefone husi ema ne’ebe maka hau lahatene, tanba nia nomor la sai, hau simu hodi dehan halo, maibe ema ne’e nonok deit, ne’e duni hau taka tiha,” deklara vitima FS, bainhira halo julgamentu ba kazu ne’e iha Tribunal Distrital Dili (TDD), Mandarin, Dili.
Vitima ne’e konta, hafoin nia taka tiha telefone ne’e, arguidu husu se mak telefone e vitima nonok deit tanba tuir lezada asuntu ne’e la importante.
“Tanba nomor laiha, hau mos la hatene mai husi se,ne’e duni hau kontinua toba no hau la resposta, maibe nia haruka hau hader no nia baku hau, dada hau tun ba rai, depois nia nonok tiha no fuma sigaru, la hatene nia hanoin saida fali, nia besik mai hau sunu hau nia kapas ho sigaru,” Vitima FS konta.
Entertantu arguidu JD deklara katak, nia sunu nia kaben tanba la resposta nia perguntas no halo arguidu nervozu.
“Hau diskunfia nia karik nia selingkuh, tanba hau husu telefone husi se nia nonok deit, mane se deit pasti diskunfia,” deklara Arguidu JD.
Arguidu mos rekonese katak, nia baku duni vitima no sunu nia kabas ho sigaru. “Hau baku nia, hau dudu deit nia to’o nia monu ba rai, depois maka hau basa nia, depois hau sadar tiha, hau fuma sigaru tur iha nia sorin, depois hau husu ba nia mane se’e maka telfone ho kalan hanesan ne’e, nia nafatin nonok, ne’e maka hau atu tuku nia maibe sigaru maka kona nia,” dehan Arguidu ne’e.
Julgamentu ne’e diriji husi juis kollektiva, juis Prezidente Edite Palmira, Jose Maria de Araujo no Antonio Gomes, Reprezentante husi Ministeriu Publiku Prokurador Jose Ximenes, no Arguidu hetan defeza husi Advogadu Cancio Xavier.
Entretantu hafoin rona tiha deklarasaun husi Vitima no Arguidu Juis Prezidente deside katak, sei kontinua tan rona deklarasaun husi testamunha.
