Border Pass ka Pasa Fronteira validu deit ba komunidade sira iha Distritu tolu ne’ebe baliza kedas ho Indonezia, liu-liu iha Atambua, tanba ne’e bainhira benefisiariu sira uza la tuir regras ne’ebe iha, sei hetan sansaun pena prizaun ka bele selu multa.
“Kuandu komunidade la kumpri ba regras ne’e, sei selu multa 50 mil dolares no hetan pena tinan ida iha Tribunal, tuir lei aziliu imigrasaun nian,” dehan Diretora Nasional Rejistu Notariadu, Maria de Araujo de Jesus, (10/07), iha Aeroportu Nicolao Lobato, Comoro, Dili.
Diretora dehan, Polisia Fronteira no Polisia Imigrasaun sempre halo kontrolu ba komunidade sira ne’ebe maka uza Border Pass.
“Wainhira komunidade sira ne’ebe maka halo ona viazen no registu iha imigrasaun antaun polisia sira iha parte ne’eba sempre kontrolu, tanba tempu nebe maka fo ne’e loron tolu deit,” dehan Diretora ne’e.
Entertantu Deputadu Manuel Tilman, hateten seguransa ne’e importante, nune’e bele la’o tuir lei ne’ebe maka iha.
“Hau hanoin presiza atu kontrolu, maibe durante ne’e hau hanoin laiha komunidade ida ne’ebe maka uza border pass ne’e la kumpri regras,” dehan Deputadu Tilman.
