“Eletrisidade tama iha tinan 2001, maibe ami uma kain 10 sira la monta fiu ba ami atu dada tutan ba ami nia uma,” preokupa Komunidade Joao Freitas Sarmento, (07/07), iha Suku Wailili, Baucau.
Tanba ne’e nia parte husu ba Governu atu aranja fiu metan hodi monta ba iha airin eletrisidade, atu nune’e sira bele dada tutan ba uma kain sanulu ne’e.
Preokupasaun hanesan mai husi komunidade Apolonia Maria Fraga ne’ebe seidauk hetan enerjia eletrisidade, sente triste tanba sira nia maluk sira seluk asesu hotu ona ahi.
“Ami nia maluk sira barak mak hetan ona enerjia eletrisidade maibe ami uma kain 10 ne’e mak to’o agora fiu metan la iha atu dada tutan ba ami nia uma,” Komunidade Fraga tenik.
Entretantu tuir Deputadu Mario Viegas Carascalao hateten, ne’e responsabilidade Governu Aliansa Maioria Parlamentar (AMP) ninian.
“Uluk ami iha Governu AMP ami nia partidu la kaer kestaun eletrisidade, maibe Partidu CNRT mak kaer,” dehan Deputadu husi Bankada Partidu Sosial Demokrata (PSD) ne’e.
