Diretor da Eskola Primaria Wailili, Distritu Baucau, Domingos Cabral lamenta tebes ho attitude votante sira ne’ebe kose tinta ba didin lolon eskola nian, tanba halo foer fali eskola.
“Tinta iha imi nia liman labele kose fali ba eskola ,se la’e eskola foer hotu ,” hase Diretor Eskola Primaria Wailili, Domingos Cabral, (07/07), bainhira hare votante ida kose hela tinta iha liman ba didin lolon eskola nian.
Hafoin hare akontesementu ne’e, Diretor da Eskola ne’e fo kedas avizu ba votantes sira iha Sentru Votasaun ne’e, atu labele kose tan tinta iha didin.
Entertantu Observador Francisco F.Belo iha Sentru Votasaun katak, ida ne’e la’os foin primeira ves akontese, maibe akontese mos iha eleisaun prezidensial.
“Ita koalia bebeik mais votante sira lakohi rona, kose nafatin,” Observador ne’e dehan.
Iha sorin seluk Profesor Eskola Primaria Wailili,Fernando Clau Soares Marques informa, antes atu loke Sentru Votasaun iha Eskola refere Profesor hamutuk Lider komunitaria halo ona akordo katak votante sira ba vota la bele uja tinta kose fali ba didin eskola nian.
“Ami esplika tiha ona ba votantes hotu-hotu, maibe sira la kompriende nafatin, lolos sira konsidera eskola hanesan sira nia uma, kuidadu, agora sira mai vota tiha sira kose fali tinta ba iha eskola signifika katak ijiene laiha,” Profesor ne’e tenik.
