“Tuir ami nia oklu katak situasaun jeralmente normal hela, ita hare iha estrada hotu-hotu ne’ebe movimentu kareta la’o ba mai diak hela, maske iha ema balu la sai husi uma tanba tauk, ne’e normal,” dehan Diretor Servisu Investigasaun Criminal (SIC), Superintendente Xefe Calisto Gonzaga, (18/07), iha Kaikoli, Dili.
Kona ba komunidade sira ne’ebe sei trauma ho situasaun ida ne’e, Superintendente Gonzaga husu atu labele tauk tanba polisia kontinua mantein seguransa ho masimu.
Entertantu tuir observasaun Deputadu Joaquim Amaral ba situasaun iha capital Dili hafoin akontesementu ne’e, nota katak, situasaun en jeral la’o normal fali hanesan uluk.
“Kondisaun normal fali ona, maibe saida maka ita preokupa no lamenta ne’e mak violensia ne’ebe maka mosu,” dehan Deputadu ne’e.
Tanba ne’e nia husu ba polisia tenke mantein seguransa, no tenke hala’o servisu ho profesionalismu liu tan, liu-liu bainhira halo atuasaun ba kualquer aktus ne’ebe maka mosu.
