Maske Governu liu husi Ministerio Saúde ho parseiru internasional no nasional sira esforsu aan atu kombate moras lepra iha rai laran, maibe realidade ema barak mak sei afetadu moras ne’e ate agora.
“La’os livre total husi moras lepra tanba ema barak mak afetadu moras ne’e, maibe ita elemina ona numeru privalencia < 1/ 10.000 populasaun to’o ona iha sekitar 0, 5/ 10.000 populasaun, tanba nasaun ida susar tebes atu mos husi lepra ho razaun komunidade balun hela la tetap,” dehan Staf Rekursu Humanu Misaun Lepra iha Timor-Leste, Nona Reis, iha Balide, Dili.
Nia esplika, moras lepra la hada’et liu husi han hamutuk, troka ropa ba malu, toba hamutuk maibe liu husi fanin ho durasaun tempu ne’ebe naruk.
Tanba ne’e nia parte kontinua enkoraja ba komunidade sira ne’ebe afetadu mras ne’e, atu hakbesik aan ba iha fasilidade saude, tanba agora iha aimoruk Multi Drug Therapy (MDT), hodi kura moras ne’e ho gratuita.
“Se la halo tratamentu pasiente ho moras lepra bele lakon nia liman fuan, ain fuan e mos bele halo matan aat,” esplika Staf Reis.
Enkuantu Staf Administrasaun Mission Leprosy, Laura Ximenes katak, Misaun Leprosy Timor-Leste suporta finanseira ba pasiente moras lepra ho montante US$ 500,00 to’o US$ 1.000,00 kada grupu nune’e sira bele hatutan sira nia moris.
iha tinan 2003 Ministeriu Saúde halo parseria ho Missaun Leprosy Timor-Leste, atu fo formasaun kapasitasaun ba pesoal saúde sira, hasae sira nia konesementu kona ba atendementu moras lepra ba komunidade tanba pesoal saúde mak fo asistensia direitamente ho pasiente.
Iha parte seluk Membru Parlamentu Nasional, Deputada Josefa Alvares Soares rekonese katak iha duni esforsu husi MS no Organizasaun Internasional no Nasional sira atu kombate moras ne’e no konsege redus, maibe la signifika katak livre ona.
“Sei iha balun afeta ba moras Lepra tanba komunidade balun la hetan informasaun husi moras ne’e, kuandu ita kompara ho moras Lepra ho virus HIV/SIDA numeru sei as liu,” dehan Deputada Alvares.
