Prosesu pagamentu Tunjangan Hari Tuan (THT) ba eis Funsionariu Indonezia ne’ebe hala’o husi Sekretariu Estadu Formasaun Profesional e Empregu (SEFOPE), hahu iha 05 Junu iha Distritu hitu la’o ho diak e benefisiariu sira forma linha ho kalma.
“Seiguransa diak, buat hotu la’o ho kalma, ema hotu iha pasensia hamrik iha linha atu simu sira nia direitu, maibe iha benefisiario ida husi distritu Viqueque nia naran los maibe numeru registo funsionario ema seluk nian, entaun ami labele fasilita pagamentu ami tenke konfirma lai ho governu Indonesia keta dala ruma iha failansu teknika sira mak keta hakerek salah numeru sira ne’e,” dehan Diretora Nasional Relasaun do Trabalho (DNRT), Auxiliadora de Gusmão Guterres, iha Kaikoli, Dili.
Distritu hitu ne’ebe halo pagamentu mak hanesan Distritu Viqueque, Lautem, Baucau, Aileiu, Bobonaro, Liquisa inklui Dsitritu Ermera.
Tuir nia,prosesu pagamentu hala’o iha Banku Nasional Comersiu Timor-Leste (BNCTL) iha kada distritu ida-ida.
Nia informa, iha problema oituan ho benefisiario sira, tanba sira balun simu osan la hanesan hos ira seluk maske durasaun servisu (masa kerja) hanesan, maibe ikus mai konsege resolve.
Entretantu pagamentu ba eis funsiunariu Indonezia Distritu Dili nian sei hala’o iha fulan Agustu nia laran, tanba ne’e ba sira ne’ebe la konsege simu iha sira nia distritu tanba pagamentu halo durante loron rua deit, sira bele mai simu iha Dili.
Eis Funsiunariu Indonezia iha Distritu Aileu hamutuk 113 pesoas, Baucau 241, Viqueque 155, Lospalos 232, Bobonaro 213, Liquisa (99), no Distritu Ermera iha 121.
Iha parte seluk Deputada Josefa Alvares Soares katak, ne’e direitu eis funsiunariu Indonezia nian, tanba ne’e husu ba diresaun ne’ebe toma konta ba asuntu ne’e tenke rekolha fila fali dadus benefisiariu sira, liu-liu sira ne’ebe seidauk simu tanba iha failansu.
“Ba sira ne’ebe trata asuntu ida ne’e iha obrigasaun atu hare fila fali ema nain hira mak la simu sira nia direitu tenke hadia fila fali sira nia dadaus hodi submete fali ba governu Indonezia bele provedensia fali ema sira ne’ebe la simu sira nia direitu,”Deputada ne’e sujere.
