Hahu husi fulan Janeiru to’o agora moras Infesaun Respiratoriu (ISPA) domina iha Sentru Saúde Comoro (SSC), ho total pasiente hamutuk 8.503 maioria husi ema adulto inklui mos labarik minoridade sira.Tuir Porta Voz SSC, Manuel Novo katak, moras ISPA kona tanba impaktu husi bailoro ne’ebe halo rai rahun suar maka’as, e risku ba komunidade atu hetan moras ne’e.
“Ita tenke ser iha konsiensia atu kuidadu ita nia ambiente lor-loron, labele soe lixu arbiru deit iha baleta, soe iha fatin lixu nune’e ita bele prevene an husi moras oi-oin ne’ebe iha liu-liu moras diarea no ISPA, se ita laiha konsensia difisil atu redus numeru ne’ebe iha,” dehan Porta Voz Novo, iha nia knar fatin Comoro, Dili.
Alende moras ISPA, moras ne’ebe afeta no rejistu maka’as iha SSC mak moras diarea ho total pasiente hamutuk 1.281, moras kulit iha 560, mal nutrisaun 455 maioria labarik ho idade tinan lima mai kraik, STI 204 afeta ba idade 15, Pneumonia 61, Malaria 35 inklui mos Tubercolouce (TBC) nain 58 no asidente trafiku iha 20.
Porta Voz ne’e dehan, maske ho rekursu humanu ne’ebe limitad, iha deit 43 pesoas inklui mediku, parteiras no enfermeirus, maibe durante ne’e sira atende komunidade sira iha Sub-distritu Dom Aleixo ho diak.
Iha parte seluk Responsavel Programa Servisu Integradu Saude Komunitaria (SISKA) no Promosaun Saúde, Onna Pereira katak, informasaun ne’e importante tebes ba komunidade sira atu prevene an husi moras, tanba pesoal saúde deit difisil atu prevene.
“Ami sempre halo promosaun kada loron iha sentru saúde bainhira fo atendimentu ba pasiente nune’e mos iha programa Servisu Integrado Saúde Komunitaria SISKA ita fila fali ba komunidade nia konsiensia atu prevene moras sira ne’e mak seidauk,” dehan Responsavel Pereira.
