Iha tinan 2013, Ministeriu Edukasaun (ME) sei foka maka’as liu hodi estandariza eskola Ensino Baziku Sentrais sira iha teritoriu tomak.
“Ami iha 202 eskola bazikas, hare estandariza ne’e lai pelumenus iha laran sala 15 ate 18 salas, tenke iha dapur, iha biblioteka, iha laboratorium oan ida, armajen ki’ik oan ida, ne’e para sasan merenda eskolar ninian ne’e kanaliza direitamente ba iha eskola ona, la presiza tan ofer ba iha distritu depois tau tan ba iha kareta mak lori ba iha eskola,” hateten Diretor Jeral ME, Apolinario Magno, (28/06), iha Vilaverde, Dili.
Alende ne’e tuir DJ.Magno, eskola sira ne’e mos sei kompletu ho sala enkontru professor sira, sala ba professor sira, tenke iha sala ida ka rua ba diretor sira ho apoiu tekniku sira. “Depois eskola ensino baziku, ita hare fali eskola sekundariu sira,”.
Entretantu tuir Kordenador Nasional Timor-Leste Coalition of Education (TLCE), David Bendito da Silva katak, atu estandariza eskola hotu iha teritoriu tomak, governu tenke aloka orsamentu ne’ebe ho montante bo’ot ba iha area edukasaun nian.
“Se orsamentu oituan 8 ka 10 milioens deit, ita labele halo buat ida, ita bele koalia doko to’o iha ne’ebe deit ita labele halo buat ida, tanba orsamentu 10 milioens ne’e uza deit ba makina estadu nian,” dehan Kordenador TLCE, da Silva.
Iha parte seluk tuir Kordenador Programa TLCE, Matias dos Santos katak, kondisaun infraestrutura eskola nian ne’ebe aat fo impaktu ba kualidade edukasaun ne’ebe diak.
“Ita hare infraestrutura iha teritorio Timor laran tomak kuaze la iha estandar, e espera katak governu foun ne’ebe mak mai, sira bele estandariza eskola ho modelu ne’ebe mak kualidade diak,” Kordenador dos Santos esperansa.
