“Ami fa’an fali iha ne’e tanba durante ami fa’an iha merkadu Manleu ami nia sasan sai dodok tiha deit tanba ema la hola,” dehan Negosiante Joaquina Gusmao, (02/07), iha merkadu Comoro, Dili.
Negosiante ne’e mos husu ba governu atu labele muda tan sira, tanba iha merkadu Comoro ema barak mak sosa sira nia sasan kompara iha Manleuana.
Razaun hanesan hato’o husi Negosiante Juleta Gusmao, katak durante sira fa’an iha merkadu Manleuana ema ladun sosa sira nia modo no halo sira modo sai dodok hotu.
“Hau nia fatin iha duni iha ne’eba maibe ema la sosa hau nia sasan entau hau lori fali hau nia sasan mai iha Merkadu Comoro ne’e,” dehan Negosiante Gusmao.
Negosiante ne’e mos pronto atu ba fali iha merkadu Manleuana maibe governu tenke kria kondisaun hanesan Estrada no transporte, nune’e ema bele sosa sira nia modo iha ne’eba.
Entretantu Xefe Suku Fatuhada, Marcelino Soares lakohi fo komentariu kona ba estaun ne’e, tanba ne’e kompetensia Minsteriu Turismu Comersiu e Industria (MTCI) no Administrasayun Distritu Dili nian.
“Governu tenke buka hatene tanba saida make ma sira ne’e mai fali fa’an iha ne’e,” dehan xefe Suku ne’e.
Tuir nia, governu kria kondisaun ba negosiante sira ne’ebe fa’an iha merkadu Manleuana, nune’e sira labele muda ba mai.
“Mikrolet 03, 06 no 05 halai duni ba iha ne’eba, mais la tama to’o iha merkadu laran,entaun fo impaktu ba iha sira nia sasan sai la folin,” Xefe Suku Soares katak.
