Elisaun parlamentar 7 Julhu 2012 lao ho susesu na la iha iha krimi ka violensia destabilizadora no polisia halo’o nia knar ho diak no komunidade mos iha konsensia atu kria paz no estabilidade iha rai laran.
“Laiha akontesimentu ruma durante elisaun, ne’ebe ke sai impedementu ba elisaun parlamentar. La iha krimi rum; buat hotu-hotu lao diak no polisia akompania nafatin durante prosesu elisaun lao iha 7 de Julhu foin liu ba ne’e,” dehan Komandante do Kommando Operasional Nasional, Superintendente Chefe Armando Monteiro, iha nia knar fatin iha PNTL Caicoli (9/7).
Tuir nia, alende polisia halo nia knar iha mos partisipasaun husi komunidade atu fo sira nia kontribuisaun.
“Povu mos iha konsiensia rasik oinsa para bele kopera hamutuk ho polisia atu bele asegura siguransa iha rai laran,” dehan Superintendente Chefe Monteiro.
No maske Eleisaun Parlamentar remata ona maibe polisia Nasional Timor-Leste (PNTL) sei nafatin fo seguransa masimu to’o prosesu forma governu.
“Ami sei fo seguransa masimu nafatin to’o rona rezultadu, to’o forma governu. No ami monta seguransa ne’ebe maka barak iha distritu ne’ebe maka ami determina katak ne’e risku konflitu. Prosesu ne’e ami halo hela,” dehan Kommando Operasional Nasional, Superintendente Chefe Armando Monteiro, iha nia knar fatin iha PNTL Caicoli (9/7).
Tuir nia, Polisia Nasoens Unidas (UnPol) mos servisu hamutuk ho PNTL ne’e duni husi PNTL fiar katak buat hotu sei lao ho diak.
“UnPol mos ami tau iha fatin-fatin risku konflitu sira ne’e, atu nune’e sira bele ajuda PNTL hodi asegura karik iha buat ruma,” hateten Superintendente Chefe Monteiro.
Entertantu Deputadu Manuel Tilman, apresia tebes ho knar polisia nian iha baze atu asegura seguransa rai laran durante elisaun parlamentar.
“Prezensa polisia no atuasaun polisia nian kapas tebes no ita bele dehan katak polisia hatudu duni sira nia knar ho diak,” hateten Deputadu Tilman.
Tuir nia, durante prosesu elisaun laiha krimi no asaun nebe maka fo impaktu nebe ladiak ba prosesu elisaun no ne’e pontu nebe maka pozitivu tebes.
Deputadu Tilman hateten katak polisia tenki akompania nafatin atu fo seguransa to’o remata.
“Polisia tenki servisu to’o fin, rona rezultadu no forma governu, karik iha buat ruma polisia bele foti medidas lalais, laos fo siguransa deit iha tempu elisaun maibe to’o hotu,” dehan Deputadu Tilman.
Tuir Deputado ne’e ne’ebe mos foin compete nudar kandidatu ho partidu durante eleisaun parlamentuar atu assegura nia fatin nudar Deputado Parlamentu Nasional, fiar katak sei la mosu buat ruma ne’ebe maka ladiak tanba povu mos em geral la koi ona konflitu tanba ema hotu-hotu hakarak moris hakmatek.
