Lideransa partidu bo’ot rua Congresu Nasional Rekonstrusaun de Timor (CNRT) no Frente Revolusiunariu Timor-Leste Independente (FRETILIN) garante katak sira nia partidu rasik mak sei manan maioria votos iha eleisaun Parlamentar ne’ebe ohin (7/7) foin realiza iha rai laran tomak.
“FRETILIN tenke manan duni, no kaer ukun duni durante tinan lima oin mai,” hateten Prezidente Partidu FRETILIN, Francisco Guteres Lu-Olo, ne’ebe tuir votasaun iha Eskola Primaria Farol, Dili.
Kona ba karik sira sei halo koaligasaun karik la hetan maorioa votos atu hetan 65 kadeiras iha Parlamentu Nasional, Prezidente Lu-Olo dehan sira sei iha politika ida depois de rona rezultadu eleisaun nian.
Deklarasaun hanesan hato’o mos husi Prezidente partidu CNRT, Kay Rala Xanana Gusmao, ne’ebe fiar aan katak nia partidu sei manan maioria no sei ukun governu durante tinan lima mai tan.
“Hau konfia ami nia partidu manan, primeiru tanba iha partidu laran ami halo reuniaun be-beik, ami analiza ami nia frakeza no ami nia kbi’it no saida maka presiza halo no saida maka seidauk halo,” dehan Prezidente Partidu CNRT Gusmao haktuir tan.
