Maske durante Eleisaun Parlamentar 2012 (7/7) partidus politiku 18 no koligasaun partidus tolu mak kompete votantes Timor-Leste la sente duvidas hodi fo sira nia votus konfiansa ba partidus tuir konsiensia rasik ida-idak.
“Hau hanoin katak ida ne’e mak dehan Demokrasia. Ema hotu-hotu iha direitu atu harii partidu no livre atu asesu ba eleisaun, maske partidu barak maibe ami hatene ona partidu ne’ebe atu hili,” dehan votantes Manuel Soares, hafoin tuir votasaun iha Sentru Votasaun Eskola 10 de Dezembru, iha Comoro, Dili.
Votante ne’e mos garante katak, partidus ne’ebe nia hili sei manan no sei ukun governu durante tinan lima ne’e.
Nia espera katak, ho konfiansa ne’ebe povu fo ba kandidatu partidos sira ne’ebe sei ukun iha tinan lima mai, bele kopera ho orgaun ne’ebe nasaun ida ona hodi bele dezenvolve nasaun ida ne’e ba futuru liu-liu bele fo atensaun mos ba area rurais sira ne’ebe seidauk sente dezenvolvimentu.
Iha parte seluk, Votantes Saturnina Claudia, sente kontente tanba bele ezerse nia direitu ho diak sein konflitu.
“Buat hotu la’o ho diak, tanba iha seguransa husi ita nia Polisia sira no Polisia estranjeiru nian, e ami vota ho seguru,” hateten Votante Claudia.
Maske iha konfuzaun oituan ho lista kandidatu Parpol nian ne’ebe barak, maibe ikus mai bele deside no hili duni partidu ne’ebe nia hakarak.
“Atraza oituan tanba ami ferik ona matan a’at, entaun ami presiza hare didiak bainhira vota, hau la bele hatene partidu ida ne’ebe mak atu manan, importante mak partidu ne’ebe deit mak manan tenke lori povu ne’e ba oin,” dehan Votante ne’e.
