Ho falta salas aulas nian, Eskola Primaria numeru 09 Aimutin, Dili, implementa sistema rotativa ba alunus sira, nune’e estudante hotu bele tuir prosesu aprendijazen ho diak.“Ami nia eskola Aimutin ne’e sala la to’o mak ami fahe, balun tama dader no balun lorokraik,” informa Profesora Castora Dias Fernandes, (19/06), iha nia knar fatin Aimutin, Dili.
Enkuantu total salas ne’ebe agora iha hodi uza ba aulas hamutuk salas sia (9), ho total alunus hamutuk rihun ida resin (1.000 e tal).
Kona ba planu atu aumenta salas, Profesora Fernandes dehan, ne’e kompetensia Diretora eskola nian e nia mak bele halo proposta ba iha Ministeriu Edukasaun.
Alende falta salas, nia dehan eskola ne’e mos bee sempre nalihun bainhira tempu udan.
Entertantu Kordenador Nasional Timor-Leste Coalition for Education (TLCE), David Bendito da Silva katak, problema falta de salas aulas,laos deit akontese iha eskola ne’e maibe iha teritoriu tomak.
“Iha nasaun sub dezenvolvidu hanesan Timor, setor edukasaun presiza tau orsamentu bo’ot para bele dezenvolve area edukasaun, maibe durante ne’e buat barak mak la’o ladiak, sistema ladiak, fatin eskola mos ladiak, profesor sira nia salariu minimu, oinsa mak eskola ne’e bele la’os,” Kordenador da Silva kestiona.
Tuir nia, durante ne’e orsamentu ne’ebe Parlamentu aprova kiik liu no la sufsiente atu resolve problema ne’ebe setor edukasaun infrenta.
Hatan ba kestaun ne’e Diretor Ensino Baziku , Alfredo de Araujo katak, kona ba falta de salas aulas, eskola iha kompetensia tomak buka meius oinsa para alunus sir abele tuir prosesu aprendizajen ho diak.
“La’os Ministeriu da Edukasaun mak ba iha ne’eba dehan, o tenki tama ida ne’e maibe orariu tuir kurikulu, sira mak estabelese, nasional nunka ba mete fali, imi tenke jere hanesan,” dehan Diretor de Araujo.
Diretor ne’e katak, problema falta de salas la’os akontese deit ba eskola sira iha Dili laran maibe iha teritoriu tomak, e maske proposta hatama hotu mai iha ME, maibe imposibel atu resolve hotu.
