iha dia 22 Junhu Tribunal Distrital Dili (TDD) halo julgamentu ba sira nia kazu,e akontesementu ne’e rasik akontese iha Delta 2 Comoro, iha 20 Abril 2011.
Vitima AL konta, wainhira nia kuru hela bee iha nia uma, derepenti suspeitu WL (oan), mai no tama iha uma laran diskuti malu kona ba SMS ne’ebe maka dehan, vitima nia fen ki’ik trata WL no nia alin sira.
“Hau ho hau nia fen kuru hela bee iha kotuk, derepenti deit WL tama no hau nia ferik oan maka koalia ho nia, sira nain rua diskuti malu kona ba SMS ne’ebe maka dehan katak, hau nia fen SMS trata fali sira ho nia inan , tanba hau lakohi nia la respeitu hau nia ferik oan, hau bolu nia no koalia iha liur,” deklara Vitima AL, iha Tribunal Distrital Dili (TDD), (22/06), iha Mandarin , Dili.
Wainhira suspeitu WL no AL sai ba liur, sira komesa dudu malu no WL lori besi kanu atu baku vitima, maibe Vitima tama tiha ba uma laran, e AL nia fen ki’ik xavi tiha odamatan.
“Hau nia ferik oan xavi tiha odamatan, para hau labele sai ba liur, maibe WL dehan…. he.. o mane sai mai, para ita baku malu, ho liafuan ne’e hau tensaun, no hau dudu tiha hau nia ferik oan no foti xavi hodi sai ba liur, to’o iha liur WL baku hau ho helm no foti fali fatuk ne’ebe maka hau lori sai ba liur ne’e, nia hodi fali baku hau iha hasan to’o hau nia nehan monu,” Vitima AL konta.
Hafoin baku malu, vitima tenke hala’o tratamentu durante semana rua iha Ospital Nasional Guido Valadares (HNGV).
Entertantu suspeitu WL dehan, nia ba uma ne’e hanesan visita nudar oan ho aman no atu husu kona ba SMS ne’ebe maka nia hatene katak ne’e mai husi nia pai no nia madrasta.
“Wainhira hau to’o iha ne’eba, hau nia pai nia ferik oan ne’e dehan fali nusa mak o mai atu halo problema deit, ba tiha,mais hau nonok deit no hau husu kona ba sms ne’e hodi husu, diak liu haruka o nia inan halo uma mutin kuandu labele imi hela deit iha ponte okos,” dehan suspeitu WL iha julgamentu ne’e.
Suspeitu ne’e dehan, wainhira nia diskuti malu hela ho nia madrasta kona ba SMS ne’e, maibe nia pai lori WL ba liur hodi dehan suspeitu la’os nia oan.
“Dehan hau ne’e la’os nia oan, antaun hau dehan kuandu hau la’os o nia oan antaun tafui iha hau nia liman laran, nia tafui iha hau nia liman laran, depois hau kose nia kaben ne’e iha nia faru. Ho ida ne’e maka nia dehan hau atu baku nia, ne’e duni nia halai ba uma laran no dehan, o hein iha ne’e hau ba foti samurai para tetak o,” konta suspeitu WL.
Suspeitu rekonese katak, los duni nia baku duni vitima ho helm dala ida no vitima tuda nia ho fatuk kona iha liman.
Enkuantu julgamentu ne’e diriji husi Juis Collectiva, Juis Prezidente Antoninho do Carmo, Antonio Gonsalves, no Antonio Gomes, Reprezentante husi Ministeriu Publiku (MP), Prokurador Baltazar Ramos, no Suspeitu hetan Defeza husi Advogado Manuel Exposto.
Depois de rona deklarasaun husi Vitima no Suspeitu, Juis Prezidente deside katak suspeitu WL sei mai iha TDD iha 08 Julhu 2012, tuku 03:00 lokraik,otl, atu rona rezultadu ikus.
