Ho menus rekursu umanu iha sala maternidade Sentru Saúde Comoro (SSC), obriga parteira sira iha fatin ne’e tenke servisu doubradu (rangkap).
“Ami parteira iha ne’e terbatas los, e ami iha ne’e hala’o servisu dobel, orsida halai ba fo ajuda inan sira partus, fo konsulta ba inan isin rua, inklui mos fo atendementu planeamentu familiar ba inan feto sira, halo ita ulun moras,” hateten Parteira Onna Pereira, (22/06), iha nia knar fatin Comoro, Dili.
Tuir nia, lolos total parteiras ne’ebe halo servisu iha SSC ne’e hamutuk 11 pesoas, maibe balun kondisaun la premiti, e nain ualu mak ativu hodi atende pasiente sira,liu-liu inan rua no atu partus.
“Sala maternidade ida tenke iha parteiras mais u menus hamutuk 15 pesoas, atu nune’e bele halo rutina ba servisu dader no lokraik,” dehan Parteira Pereira.
Iha parte seluk Reprezentante Xefe SSC, Manuel Novo rekonese katak, la’os Parteiras deit maibe Tekniku Profesional sira mos menus, e kestaun ne’e hato’o ona ba iha Ministeriu Saude (MS), maibe seidauk iha rezultadu.
“Ami hatama tiha ona proposta ba ministerio antes loke sala maternidade ne’e maibe nia prosesu rekrutamentu mak seidauk, iha proposta ne’e ami husu atu rekruta tan ema nain ualu maibe konforme ministerio, penting bele halo rotasaun,” dehan Xefe Novo.
Tuir dadus ne’ebe iha hahu husi fulan Janeiru to’o fulan Junhu dia 22, inan ne’ebe partus iha sala maternidade SSC, ho kondisaun normal hamutuk 254 pesoas, enkuantu ho komplikadu hanesan tensaun,
kondisaun bebe ladiak no seluk tan, SSC halo rujukan ba iha Ospital Nasional Guido Valadares (HNGV).
Iha okaziaun ne’e mos parteira sira husu atu ministerio saúde bele supporta kursi roda ba sala maternidade sentru saúde Comoro nune’e bainhira inan atu partus presiza atu muda pasiente ba sala observasi nian se laiha difisil ne’e parteira sira tenke kos pasiente hodi muda ba sala observasaun nian.
