Atu responde preokupasoens no nesesidade joventude sira nia iha distritu sira, Konselhu Nasional Joventude Timor-Leste (CNJTL) iha ona planu atu hari Sede Konselhu Joventude (SCJ) iha Distritu tuir kbi’it ne’ebe iha.
Tuir Prezidente CNJTL, Leovigildo Hornai katak, intensaun atu hari SCJ iha distritu atu halibur joventude sira hotu iha nivel distritais, liu-liu prepara sira sai parseiru ba governu sentral ou munisipiu, tanba iha future orsamentu sei investe maka’as liu iha distritu.
“Iha programa prioridade ida mak hau hakarak, iha hau nia mandatu tinan lima sekretariado iha distritu hotu tenke iha sede ida ba konselhu nasional joventude distritais sira, atu iha fatin ida hodi organiza malu ho organizasaun ne’ebe hola parte ho CNJTL atu promove joven sira ne’ebe iha talentu oioin (Arte, Musika no seluk) ho diak,” dehan Prezidente CNJTL, Hornai, (12/09), iha nia knar fatin Farol, Dili.
Alende harii SCJ nivel distrital, CNJTL mos iha programa prioridade seluk mak hanesan, hatur CNJTL sai organizasaun ne’ebe imparsial luta ba interese joventude nian, inklui mos prepara CNJTL tama iha membru regional Asia Tengara no Konselhu Joventude Komunidade Paises Lingua Portuguesa (CPLP).
“Loke rede ba Timor oan sira ne’ebe hala’o estudu iha estranjeiru bele sai hanesan reprezentante CNJTL, koalia buat ruma kona ba interese joventude Timor nian nune’e mos prepara kuadrus lideransa joventude sira,” Prezidente Hornai dehan tan.
Nia hatutan, iha nia segundu mandatu durante tinan lima ba oin, sei tun iha baze liu-liu distritu no sub-distritu sira, atu hare direitamente situasaun ne’ebe jovens sira hasoru no fo korajen ba strutura iha nivel distritu sira.
Iha parte seluk Prezidente Komisaun H Parlamentar, Antonio Cardoso hateten ida ne’e importante tebes, atu joven sira mos bele partisipa iha dezenvolvimentu iha area oi-oin maibe tenke kopera diak ho governu.
“Hau hanoin buat sira ne’e ita tenke pasiensia, hau aseita buat sira ne’e maibe ba futuru sira presiza hare no tenke kopera diak ho governu nune’e la’o ho planu no programa governu nian atu ikus mai labele hetan difikuldade, ema bele rekonese ezistensia joven nian,” dehan Preziedente Cardoso.
