“Hau laran metin duni katak, ho planeamentu seguransa ne’ebe maka hala’o dadauk, buat hotu bele la’o diak, no hau fiar tanba iha eleisaun prezidensial hatudu duni katak PNTL susesu,” dehan Reprezentante Sekretariu Jeral Interinu ONU iha Timor-Leste, Finn Rieske-Nielsen, (20/06), iha UNMITm, Kaikoli, Dili.
Maske nune’e ONU pronto atu apoiu seguransa wainhira PNTL husu ajuda, tanba durante ne’e sira iha koperasaun ne’ebe diak.
Entertantu Segundu Komandante Jeral, Komisariu Afonso de Jesus katak, PNTL mantein fo seguransa maximu durante kampanha no depois de rona rezultadu eleisaun Parlamentar.
“PNTL prontu atu asegura kualker situasaun ne’ebe maka mosu iha baze, ne’e knar PNTL nian, tanba nasaun no komunidade fo fiar, ne’e duni ami tenke kumpri ami nia knar atu kria situasaun ne’ebe maka saudavel iha komunidade nia le’et,” hateten Komisariu de Jesus.
ONU, nudar parseiru ne’ebe maka diak tebes, sempre ajuda PNTL ne’e duni la taka dalan wainhira sira fo sira nia kontribuisaun iha kualker tempu, Komisariu ne’e dehan.
