“Hau levanta kestaun ne’e atu evita loron ikus mosu problema, labele tau todan ba ami autoridade lokal. Tanba iha esperiesnia lubuk ida ona maka sai referensia, programa tun langsung hasoru komunidade la konsidera ami, hafoin iha prolema tau todan mai ona,” kestiona Xefe Suku Lela Ufe, Jose Poto, semana kotuk, bainhira partisipa iha enkontru kona ba avaliasaun servisu programa KOMPASIS nian, iha Salaun BDC Santa Rosa, Distritu Oe-Cusse.
Alende ne’e KOMPASIS mos presiza habelar liu tan sira nia area servisu to’o iha aldeia, liu-liu iha Sub-distritu Nitibe.
“Labele fihir aldeia balun, tanba imi nia vizaun mak atu hatun mukit” dehan Xefe Suku ne’e.
Bazea ba akordu entre Programa Dezenvolvementu Nasoens Unidas (UNDP) ho Governu Timor-Leste, KOMPASIS implementa nia programa iha Distritu rua mak; Distritu Oe-Cusse (Sub-distritu Pasabe no Nitibe) no Distritu Ermera durante tinan tolu nia laran.
Preokupasaun hanesan mai husi Ofisial Governu Lokal (OGL), Teodoro Sila katak lina kordenasaun nee importante, nune’e ema hotu bele partisipa iha programa ne’e.
“Para ita hotu akompanha no mobiliza povu partisipa iha programa ne’e, la’os ema grupu ki’ik ida, depois relata ba mundial katak Oé-Cusse livre, mas cek di-diak programa la la’o, ne’e la’os hau dehan Kompasis konta sai deit esperiensia ita nia distritu ne’e,” OGL. Sila dehan.
Hatan ba kestaun ne’e Reprezentante UNDP Reinaldo da Costa Soares, katak sira sei halo lina kordenasaun ne’ebe diak liu tan iha future ho autoridade local sira bainhira atu implementa programa ruma.
“Hau aseita ita hotu nia sujestaun, ba oin ita hadia, naran katak lideransa lokal iha fatin atu servisu. Dala ruma ami nia funsiunariu ba to’o iha ita bo’ot sira maibe ita bo’ot sira laiha la fatin, tanba okupadu ho programa PDD I, PDD II no PDL,” dehan Reprezentante UNDP Soares.
