Money Politik (fo osan ba povu hodi sosa votus), ne’e perigozu tanba povu sei la livre hodi hili sira nia lideransa ne’ebe sira hakarak iha tempu eleisaun e ida ne’e krimi.
“Labele iha money politik, labele iha partidu politika ida maka tenke ba fo osan para hodi dehan, ami fo osan ba imi entaun imi tenke vota ba ami, ne’e labele iha, tanba iha kampanha no to’o eleisaun, ema tenke livre deside partidu ne’ebe maka sira hanoin diak,” hateten Adjuntu Provedoria Direitus Humanus e Justisa (PDHJ), Silverio Pinto Baptista, (11/06), iha Kaikoli, Dili.
Alende ne’e tuir nia, iha Funsiunariu Publiku (FP) balun ba tuir kampanha lori patrimoniu estadu nian sein iha autorizasaun.
“Ami sei hare funsiunariu sira, wainhira sira tuir kampanha ami sei cek, sira tuir duni kriteria ga la’e, sira hetan autorizasaun ga la’e no iha pedidu atu lisensa ga la’e, ami sei hare hotu kona ba ida ne’e tanba money politik no boa governasaun ne’e nudar asaun ne’ebe maka perigozu,” dehan Adjuntu Baptista.
Entertantu Deputadu David Diaz, dehan money politik ne’e hanesan sosa votus ho osan, ne’e duni ne’e ladiak,e espera katak labele iha asaun hanesan ne’e.
“Pur ezemplu hau koalia ho ema ida, katak hau fo osan sekian ba ita bo’ot, yang penting ita bo’ot vota mai hau,” hateten Deputadu Diaz.
Tuir nia, wainhira iha asaun money politik durante kampanha nia laran, signifika estadu de direitu no demokrasia laiha ona.
