Programa merende eskolar iha Eskola Ensino Primaria Rumbia Kaikoli, para durante fulan neen (6) ona, tanba masin, koto no mina laiha.
“Ami nia eskola ne’e desde Janeiru to’o dia 30 Maiu foin mak haruka mai fos deit,” hateten Diretor Eskola Primaria Rumbia Kaikoli, Abilio Pereira da Conceicao, (12/06), iha Kaikoli, Dili.
Diretor da Conceicao dehan, fos ne’ebe tama mai iha eskola ne’e hamutuk 202 sakas maibe kona ba kualidade ka la’e, seidauk hatene tanba ladauk tein.
Alende ne’e tuir nia, koto ne’ebe Ministeriu Edukasaun fo ba programa merenda eskolar ne’e mos laiha kualidade e labarik sira la han.
“Labarik barak mak la han koto, tanba han koto kabun bubu, depois se mak responsabiliza ba ida ne’e tanba hau mos la kohi fo han ema nia oan terus fo tan servisu todan ba inan aman sira,” dehan Diretor da Conceicao.
Tuir nia, kestaun ne’e nia parte hato’o dalabarak ona ba iha ME, maibe laiha rezultadu to’o agora.
Iha sorin seluk Asistente Protesaun Programa ba Labarik iha Forum Tau Matan (FTM), Honorio Soares Almeida, katak, desde implementa to’o agora, merenda eskolar laiha kualidade.
“Ita bo’ot sira hare iha 2010 problema mal nutrisaun ita redus to’o 30%, agora tinan 2011 no 2012 problema malnutrisaun sa’e ,signifika katak,politika merenda eskolar ne’ebe mak iha la responde ba nesesidade labarik nian,” Asistente Almeida kestiona.
Tanba ne’e nia parte sujere ba Ministeriu Edukasaun atu hadia tiha no tenke halo investimeentu ne’ebe maka’as hodi promove hahan ne’ebe diak ba labarik sira.
Entretantu Kordenador Nasional Timor-Leste Coalition of Education (TLCE), David Bendito da Silva, afirma menu merenda eskolar ne’ebe laiha kualidade, ne’e failansu bo’ot husi parte governu nian.
“Ita dehan kria nutrisaun ba labarik, agora koto husi loja mak lori mai nutrisaun saida mak iha ne’eba, koto ne’ebe rai iha gudang tinan ba tinan mak lori mai ne’e nutrisaun,” Kordenador ne’e preokupa.
Enkuantu tuir observasaun TLCE nian kona ba implementasaun merenda eskolar iha eskola sira, identifika katak hahan ne’ebe lolos estudante sira ma khan, maibe profesores sira mak han barak liu.
“Tuir lolos hahan ministeriu edukasaun aloka mai tinan ida nian, sira han deit fulan neen la iha tiha ona tanba mestri sira mak han barak liu, dala ruma sira fa’an tan, ne’e ami hare iha fatin barak,” Kordenador ne’e dehan.
Hatan ba problema ne’e Diretor Nasional Aksaun Sosial Eskolar, Carlito Mota katak, tinan ida ne’e Ministeriu laiha planu atu fahe masin, koto,no mina ba iha eskola sira.
“Fos fo nafatin to’o iha fulan Novembru maibe koto, mina no masin la fo mas fo deit mak osan,” hatan Diretor Mota.
Nia hateten, prosesu atu aloka orsamentu ne’e sei iha prosesu nia laran tanba sei halo proposta ba iha Governu no fahe sei bazeia ba total alunus kada eskola ida-idak nian.
“Tinan kotuk 2011 ba kotuk sira ne’e, ministeriu edukasaun servisu hamutuk ho MTCI, Ministeriu Edukasaun hanesan implementador, MTCI hanesan fornesedor, MTCI fo fos ba edukasaun, edukasaun fahe ba alunus sira, koto ne’e WFP mak fo, masin, mina edukasaun mak sosa,” Diretor Mota informa.
