Komisaun Nasional ba Eleisaun (CNE), husu ba Partidu Politiku (ParPol) sira tenke kumpri sira nia orariu kampanha ne’ebe sira hatama ba iha CNE, atu nune’e labele soke malu hodi kria fali problema entre partidu.
“Laiha bandu, fatin hotu-hotu iha teritoriu tomak sira bele halo kampanha,maibe labele soke malu ho partidu seluk,” hateten Komisariu Arif Abdulla Sagran, (05/06), iha Kintal bo’ot, Dili.
Komisariu ne’e dehan, orariu kampania ba partidu politiku sira hotu, hahu husi tuku 08:00 dader to’o tuku 6:30 lokraik, enkuantu kampanha ne’e rasik sei remata iha 04 Julhu 2012.
“Ami mos husu atu sira labele fo sai liafuan ne’ebe sukit malu, labele hato’o liafuan la diak ba partidu seluk tanba ne’e bele hamosu konflitu,” Komisariu Abdulah husu.
Entertantu Deputadu Pedro da Costa husi bankada Congresu Nasional Rekonstrusaun de Timor (CNRT), dehan CNRT sei hato’o nia programa ba povu, maibe sein konflitu.
“Mensajen ne’ebe ami lori mak ne’e, mensajen da paz,mensajen estabilidade, no mensajen dezenvolvementu,” hateten Deputadu da Costa.
Nia hatutan, durante tempu kampanha, partidu CNRT sei hato’o programa partidu nian ba povu durante tinan lima nia laran, saida mak atu halo ba povu.
Iha sorin seluk Deputadu bankada ASDTversaun Gil Alves hateten, maske sira la halo kampanha maibe husu ba partidu politiku sira ne’ebe halo sira nia kampanha, tenke kria paz no estabilidade.
“Ita nia nasaun foun, foin moris tinan 10, ne’ebe presiza liu mak estabilidade, unidade no paz atu nune’e ita nia povu la’o ho hakmatek,” apela Deputadu Alberto da Cruz.
