Komisaun Nasional ba Eleisaun (CNE), husu ba inan-aman sira atu labele lori labarik sira hodi tuir kampanha tanba ne’e perigu ba sira nia vida.
“Regulamentu klaru iha ne’eba, labele involve labarik iha fatin kampanha,” sujere Komisariu CNE, Arif Abdulah Sagran, (05/06), iha Kintal bo’ot, Dili.
Tuir Komisariu Sagran, CNE halo tiha ona regulamentu ida atu bandu labarik sira involve iha kampanha, e espera katak partidu hotu iha konesementu kona ba regulamentu ne’e.
Entertantu Komisaun Direitu Labarik, Komisaria Adalgiza Magno katak, labarik sira ne’ebe partisipa iha kampanha ne’e, sira atu aprende no rona programa saida mak nain ulun sira koalia iha kampanha nia laran.
“La’os partidus politiku sira uza fali labarik sirahalo kampanha, tanba direitu politiku ne’ebe mak asegura dadauk ita nia rai halo ne’e, ba ema adultu sira la’os ba ema labarik sira,” Komisaria Magno esplika.
Tanba ne’e, nia husu ba ema hotu-hotu kontinua tau matan ba labarik sira ne’ebe tuir kampanha durante fulan ida nia laran, nune’e bele evita labarik sira para labele hetan problema ruma iha kampanha nia laran.
Komisaria Magno dehan, fo protesaun ba labarik sira la’os deit estadu maibe komunidade inklui inan-aman sira iha responsabilidade.
“Se nia ba akompanha ho inan-aman la iha problema, maibe karik partidu politiku sira para uja labarik sira uja entre aspas fo kamijola para sae kamoneta hodi hakilar,ida ne’e mak ita hanoin kiatak la los tanba ne’e laos labarik sira nia aktividade para halo ida ne’e,” dehan Komisaria Magno.
