Projeitu dollar tolu ne’ebe hala’o husi Sekretariu Estadu Formasaun Profesional e Empregu (SEFOPE) no remata iha Dezembru 2011, agora hahu implementa fali, liu-liu iha Distritu Oe-Cusse oras ne’e dadaun halo hela survey lokasi iha suku 18 ne’ebe kobre iha distritu ne’e.
Kordenador Sentru Formasaun Profesional no Emprego Distritu Oé-Cusse, Mario Muni Salu hateten, objetivu husi survey ne’e, atu antisipa suku ida labele hetan doubra.
“Ita halo ona kros cek ba suku balun, atu prevene fatin ida la bele hetan projeitu seluk hanesan hetan tiha PDD, PDL entaun sira hetan alokasaun tipu projeitu seluk. E agora falta deit suku sira ne’ebe iha Sub-distritu Pasabe no Nitibe maka seidauk halo konfirmasaun,” dehan Kordenador Salu, semana kotuk, iha Oe-Cusse.
Enkuantu total projeitu ne’ebe sei aloka iha projeitu dollar tolu ne’e hamutuk 65, hanesan loke dalan foun, rehabilita estrada kuak, inklui hamos fatin publiko ho durasaun fulan neen (6).
“Projeitu ne’e sei fo benefisiu ba povu besik rihun ida, atus sia resin e tuir planu suku ida sei involve ema na’in neen ho sistema rotativa,” Kordenador Salu esplika.
Entertantu Xefe Suku Nipane, Ancelmos Colo hateten ho projeitu dolar tolu ne’e, husi nia suku sei hadia dalan diresaun Sacato ba Nun Ana, loke dalan foun iha Aldeia Bausiu no hamos fatin rekreu iha tasi ibun.
“Sim, ami hetan projeitu fiziku tolu atu halo dalan foun ,hadia dalan no hamos tasi ibun Sacato tomak, hanesan ita hotu hatene katak tasi ibun ne’e iha fim de semana ema barak pasa feira iha area ne’eba, tanba ne’e maka povu sei hamos liu husi projeitu dolar tolu,” Xefe Suku Colo dehan.
Sorin seluk Xefe Suku Bobo Case, Virgilio de Deus dehan sira prontu atu ezekuta projeitu fizika ne’ebé deit maka oferese ba sira nia suku, hodi nune’e bele alkansa dezenvolvementu iha rai laran.
