“Agora dadaun sira ne’ebe maka estajiu ne’e, sira manan ona osan hamutuk US$ 150.00, tenke aprende terus uluk, orsida maka kontente, tanba wainhira fo enak hotu nia la hatene servisu,” hateten OJ. Ximenes, (04/06), iha Kaikoli, Dili.
Ofisial Ximenes dehan, salariu 150.00 ne’ebe sira simu kada fulan ne’e mos tuir lei, e konforme sira uza.
Tuir nia, wainhira ofisiais sira ne’e remata sira nia estajiu, Tribunal sei koko sira matenek duni ga la’e, se la’e haruka sai.
”kuandu sira matenek sei foti sira sai ofisial dilijensia, e sira manan osan barak fulan ida bele to’o 500 dolares, ne’eduni kondisaun hanesan ne’e lai, para ita hare bele duni ka la’e,” tenik Ofisial Ximenes.
Entertantu Deputadu Manuel Tilman katak, karik ida ne’e planu husi Tribunal Rekursu nian, hodi hare no koko sira nia matenek no konesementu iha sira nia servisu.
“Kuandu dehan osan laiha maka tribunal la fo ne’e hau la fiar, tanba wainhira aprova orsamentu ne’e tuir nesesidade ne’ebe maka sira presiza, karik husi tribunal maka atu halo hanesan ne’e, nune’e estajiariu sira hatene sira nia servisu, maske ho salariu minimu,” dehan Deputadu Tilman.
Tanba ne’e tuir nia, kondisaun hotu-hotu bele diak, wainhira jestaun diak, maibe jestaun ladiak buat hotu-hotu la’o ladiak.
