Fabrika sementi iha Cairavela Sub-distitu Vemase, Distritu Baucau ne’ebe hala’o husi Primeiru Governu Konstitusional, agora paradu tanba la bazea ba estudu viabilidade.
“Sira la halo lansamentu politika ida ne’e, la liu husi estudu de viabilidade ida, la hare ba rekursu ne’ebe iha no la estuda se mak atu halo fabrika ida ne’e,” dehan Deputadu Pedro da Costa, (04/06), iha Uma Fukun, Dili.
Tuir nia, durante mandatu governu Aliansa Maioria Parlamentar (AMP) nia ukun, nunka aloka orsamentu estadu nian ba iha projetu ne’e.
Entertantu tuir observasaun Deputadu Mateus de Jesus nian durante ne’e katak, maske atividade iha fabrika paradu maibe prosesu konstrusaun ba fatin ne’e la’o hela.
“Sekarik labele finaliza iha Governu ida ne’e, parese sei iha rekomendasaun e komisaun kontinua rekomenda ba iha Governu atu nune’e projetu nee kontinua ba iha Governu foun mai,” Deputadu e’e sujere.
Iha sorin seluk Deputadu Inacio Moreira katak, iha Governu anterior liu husi Ministro Komersiu no Industria, Arlindo Rangel nian, deside area Cairavela sai area industria ninian.
“Buat ne’e iha momentu ne’eba seidauk realiza, apenas halo hanesan limita deit area ne’eba sai area de industria maibe husi ne’eba la halo buat ida,” Deputadu Moreira esplika.
