Dosente ne’ebe agora dadauk hanorin iha Universidade Nasional Timor Lorosa’e (UNTL), barak liu mak Maestradu ona, no oituan deit mak Lisensiatura ho Diploma.“Ba Lisensiatura ho Diploma agora dadauk ita halo ona prosesu eskola Short Time (Eskola badak) ne’ebe sira atu kompleta lalais sira nia diploma ho lisensiatura,” hateten Administrador UNTL, Mateus Fernandes, (23/05), iha Kampus UNTL Dili.
Administrador dehan, Dosente sira ne’ebe sei iha Lisensiatura no Diploma tenke kompleta lalais sira nia estudu, tanba tama iha 2015 Dosente sira ne’ebe hanorin tenke maestradu hotu.
“Ba Dosente sira ne’ebe maestradu kleur ona, iha ne’e sira tenke ser tuir eskrisaun ba Doutoramentu, no iha 2015 hotu-hotu tenke Doutoramentu atu nune’e sira bele priense kriteria tama ba rezime kareira Dosente ninian,” Administrador Fernandes tenik.
Nia dehan,Dosente mestradu sira nebe mak atu tuir inskrisaun hodi hasai Doutoramentu ne’e sira sei tuir eskola deit iha UNTL, mas sei identifika deit balun deit mak ba iha liur.
Enkuantu total Dosente sira ne’ebe mak oras ne’e dadauk halo estudu iha rai liur, hanesan Portugal ho Brazil, hodi hasa’e sira nia maestradu no doutoramentu kuaze 50 resin, durante tinan rua e agora balun fila tiha ona.
“Kuandu to’o iha tinan 2015 mak Dosente sira la kompleta maestradu no doutoramentu, sira sai mestradu bai-bain no asistente bai-bain ou bele mos hasai sira,” dehan Administrador ne’e.
Entertantu Membru Komisaun F Parlamentar, Deputadu Francisco de Araujo dehan, ida ne’e planu ne’ebe ke diak no tenke hala’o duni, tanba mundu edukasaun husi tinan ba tinan tenke iha mudansa.
“Planu nebe UNTL foti planu ne’e nesesariu, planu ne’e diak duni atu implementa sedu, atu nune’e ita nia edukasaun bele konkore ho nasaun seluk, e tenke prepara livurs ne’ebe sufsiente ba estudante sira,” Deputadu de Araujo dehan.
Alende ne’e Deputadu Francisco Branco dehan, planu ida ne’e diak tanba tama iha padraun universal iha universidade.
“Ita sidauk iha Dosentes numeru bo’ot ne’ebe atu priense criteria, ida ne’e ita bele priense, hau hanoin ida ne’e presiza duni,” Deputadu Branco tenik.
Iha parte seluk Sekretariu Jeral Sindikatu Profesor de Timor-Leste (SPTL), Francisco da Silva Fernandes katak, Universidade iha nia otonomia rasik, oinsa atu bele implementa nia regras bazeia ba lei universidade ninian.
“Sekarik iha criteria ida para atu Dosente hotu-hotu ne’ebe iha nia tenke hasai maestradu, hau hanoin ida ne’e parte ida atu hadia kualidade ensino,”dehan Sekjer Fernandes.
