“Selebrasaun tinan 100, hakarak fo hanoin fali komprimisu ne’ebe uluk Proklamador Indenpendensia Republika Demokratika de Timor-Leste ita nia Saudozu Avo Xavi promete iha tempu ne’eba, foin dadauk ami ba Same familia husi Dom Boa Ventura mos fo hanoin katak, promesa ida ne’e to’o agora seidauk realiza,” hateten Deputadu Francisco Branco, (24/05), iha Parlamentu Nasional.
Deputadu Branco dehan, tuir familia Dom Boa Ventura iha Same, katak tempu ona atu governu kumpri promesa ne’e.
“Ami fo hanoin ona ba iha Governu, Governu dehan atu hala’o e ita hein katak, iha ami nia intervensaun iha media ne’e bele fo hanoin fila-fali ba iha Governu atu implementa promesa ne’ebe ita nia Proklamador Avo Xavier halo iha 1975,” Deputadu Branco fo hanoin.
Iha fatin hanesan Deputadu Pedro da Costa, dehan Largo Dom Henrique ne’e largo ne’ebe historiku tebes Portugues tama mai Timor, maibe atu muda largu ne’e parlamentu mak tenke pronunsia.
“Ne’ebe hau ladauk bele komentariu, porque monument Dom Henrique ne’e monument historiku marku ida ne’ebe ke fo hatene ba mundu katak Portugues sira tama iha ne’e mak tau iha sira nia monumentu,”dehan Deputadu da Costa.
Tuir nia, monumentu Dom Henrique ne’e uluk tau iha Lifau, maibe muda fali iha Palacio do Governu mak to’o agora.
“Se hakarak muda Largo ida ne’e presija Parlamentu pronunsia atu labele kria dejitendimentu ba istoria,”da Costa tenik.
Iha sorin seluk Deputadu Mario Viegas Carascalao katak, largo ne’e historia ida e labele muda tau fali Dom Boa Ventura nia naran, maske nia eroi Timor-Leste nian.
“Tuir hau kuandu bainhira hau Governador iha ne’e, iha bapa barak hakarak muda ita nia estrada, tau fali naran jalan oi-oin, hau dehan labele muda tanba ne’e historia,” Deputadu Carascalao tenik.
“Ne’ebe hau la konkorda se hakarak atu muda naran sira ne’e, se muda ne’e ita sala,” Deputadu ne’e dehan.
Maske ida ne’e hanesan promesa husi Proklamador nian, tenke husu uluk povu, povu konkorda entaun bele muda naran ne’e.
“Hau la fiar ita nia istoria ne’e ital abele taka,labele subar,ita hatene katak,Portugues tama mai iha Timor 1512 ne’e inisiativa ida mai husi Dom Infantil Henrique,”Carascalao katak.
