Kuaze tinan sanulu ona komunidade Palaban aldeia Sanane, Sucu Costa, Sub- distritu Pante Macasar, Distritu Oe-Cusse infrenta problema bee moos no komunidade kestiona tanba sa governu seidauk tau atensaun ba sira.
“Besik tinan sanulu ona, ami populasaun iha Palaban, dudu gerobak ho distansia kilometro rua to’o tolu maka foin hetan bee moos, governo la iha atensaun seriu mai ami, sira halo duni kanalizasaun bee husi Samoro mai to’o ne’e, tanki iha Oe-Upun maibe bee la iha,” hateten Komunidade Alarico Freitas, semana kotuk, iha Oe-Cusse.
Tuir Komunidade Freitas, situasaun ida ne’e afeita maka’as ba estudantes sira ne’ebé maka eskola husi nivel baze to’o secundaria iha Palaban. “Kuandu sira atu liur bo’ot no ki’ik tenke halai ba du’ut no ai laran tuan,”.
Nia espera katak, Prezidente foun no Governo foun bele rezolve problema bee moos ne’ebe durante ne’e sai preokupasaun ba iha komunidade sira tantu iha kapital ka Area urbana distritu Oé-Cusse ne’e.
“Hau espera katak ho ita nia Governo no Prezidente foun bele tau prioridade kestaun bee moos,tanba bee ne’e importante mai ita ema moris,” Komunidade ne’e esperansa.
Entertantu Xefe Sucu Costa Aleixo Abi hateten, problema bee moos iha area urbana ne’e, tanba laiha seridade husi autóridade goveno local.
“Kestaun bee moos iha capital Oé-Cusse li-liu bairo Masin no Palaban ne’e, hau hato’o dala barak ona ba sira, maibe sira dehan kombustivel la iha tanba orsamentu la iha, e hau konsidera sira la iha programa no planu,” Xefe Suku Abi tenik.
Nia mos lamenta no kritika servisu Xefe, Kordenadores no Diretores Distritais ne’ebe ladun hala’o sira nia knar ho diak, hein simu deit osan.
“Sira ne’e atu hala’o servisu la iha, hau koalia fila- fila ba Administrador, SAS maibe sira la rona ita tanba ita ema kiik, e pior liu atu haruka sira nia elementu hodi kontrola kanu tohar mos la bele realiza,’’ kritika Xefe Abi.
Hatan ba preokupasaun hirak ne’e Xefe Servisu Agua e Saneamentu Distritu Oé-Cusse (SASDO), Jose Suni Teme katak, atu hatan preokupasaun hirak ne’e, SAS halo estratejia hodi halo bee bomba no fura, maibe atu kanalliza bee ba fatin komunidade hela ba maka seidauk, tamba rekursu humanus mak limitadu.
“Ita koalia kona ba kanalizasaun bee moos, ne’e volume bo’ot entaun presiza orsamentu no tekniko, ami SAS infrenta buat sira ne’e, orsamentu atu selu ema, tamba ita koalia servissu fisiku, no ita koalia non fisiku maka ohin imi mai intervista hau,’’ hatan Xefe Suni.
Nia hatutan,SAS distritu labele halo buat ida, husi nasional foti desizasaun seluk .
‘’Pur ezemplu mina, sira fo deit kupon,entaun ita iha ne’e preparasaun mina la iha ami atu ba lamas iha ne’ebé? Atu muda ba orsamentu mos orsida dehan korupsaun entaun ami kaku, maka ema dehan ami la iha kapasidade maibe buat sira ne’e sentraliza iha nasional,’’ Xefe Suni esplika.*
