Foer hirak ne’e mak hanesan plastiku,ai tahan maran,du’ut inklui foer husi animal sira hanesan karau, bibi,no fahi.
Kondisaun ambiente fo’er ne’e,Primeiru Ministru (PM), Xanana Gusmao rasik bainhira halo vizita servisu durante semana ida resin foin lalais iha distritu ne’e, bolu atensaun ona ba iha autoridade local,atu resolve problema ne’e maibe to’o agora laiha rezultadu.
“Ami saneamentu labele halo buat barak,tanba ami nia funsiunariu ne’e limitadu, ema sanulu resin deit no servisu semana ida dala tolu entaun la bele kobre hotu kapital Oe-Cusse ne’ebé luan tebes, ita nia komunidade mos la koi kontribui hodi hamos vila iha loron Sesta-Sesta,” hateten Responsavel Saneamentu Distritu Oe-Cusse, Jose Sufa Tana, semana kotuk, iha Oe-Cusse.
Tuir Responsavel Tana, foer ataka capital Oe-Cusse tanba falta de konsiensia husi komunidade sira, nune’e mos funsiunariu sira hein orden husi Administrador.
‘’Kuitadu ita nia komunidade sira hela iha vila ne’e lakohi atu hamos sira nia uma oin, dapur no jardin, hein fali ami, kuandu hela iha kota ne’e, tenke hamos an ,la’os hein fali Administrador perintah mak foin hamos, ne’ebe la’os komunidade mesak funsiunariu sira hotu,” Responsavel Tana komenta.
Entretantu Cleaner iha edifisiu publiku, ne’ebe lakohi publika nia identidade, dehan ho area eidifisiu ne’ebe luan tebes, nia mesak labele halo buat ida, tanba ne’e presiza rekruta tan ema hamos nian.
“Ema ida deit la bele halo buat ida ba areadores edefisio ne’ebe luan tebes,” dehan fonts konfirmadu ne’e.
Iha fatin seluk Administrador Sub-distritu Pante Macasar, Gonsalo Eko hateten, lolos kada Sesta-feira funsiunariu sira halo limpeza jeral, maibe la realiza tanba funsiiunariu sira la kopera.
“Kondisaun edifisiu publiku ne’ebe maka fo’er ne’e ,ita iha ona planu hamutuk ho Administrador Distritu atu fo karta ba instituisaun ida-idak atu halo limpeza jeral iha kada Sesta,” hateten Administrador Sub-distritu Eko.
Nia mos husu ba animal nain sira, atu sulan sira nia animal iha nia fatin, nune’e la bele la’o livre iha fatin publiku, se la’e hamosu imajen la diak.
Tuir observasaun jornalista TDW iha terenu nota katak, foer hirak ne’e komesa ataka ona ba edefisiu publiku, edifisiu ONG’s no uma pribadu sira.
