“Se funsiunariu publiku ruma mak hakarak lisensa maternidade diretor fo fulan ida ho balun deit, fo hatene hau tanba hau mak mahon ba funsionario publiku atu hau bele toma atensaun ba diretores sira ne’ebe hala’o ida ne’e tanba la tuir lei no estatutu funsaun publiku,” hateten Prezidente Komisaun Funsaun Publiku (KFP), Komisariu Liborio Perreira, (15/05), iha Centru Convensaun Dili.
Tuir nia, KFP sei la foti medidas ruma bainhira laiha keixa ruma husi vitima, tanba iha Diretor balun la kumpriende estatutu funsaun publiku no lei.
Nia hatutan, lisensa maternal durante fulan tolu ba deit funsiunariu permanente maibe sira ne’ebe kontratadu fulan neen, ne’e nia laiha direitu.
Tanba ne’e, Komisariu Pereira husu ba funsionariu feto sira labele maten atu reklama sira nia direitu bainhira hetan violasaun husi diretores sira, no tenke lee no komprende estatutu funsaun publiku nian.
Entretantu vitima ne’ebe lakohi fo sai nia identidade no nia servisu fatin ba publiku, lamenta ho desizaun husi nia diretor ne’ebe fo deit fulan ida resin foti cuti partus nian.
“Hau foin dadauk cuti partus ne’e, diretor fo deit fulan ida resin padahal hau funsiunariu permanente tiha ona, ami atu protesta mais ami la brani,” hateten fonts konfirmadu ne’e.
Iha parte seluk Membru Ezekutive Konfederasaun Sindikatu Trabalhadores Timor-Leste (KSTL), Francisco D. C Fernandes, dehan ida ne’e hatudu katak, diretor sira halo violasaun hasoru funsionario sira tanba latuir ona lei no estatutu funsaun publiku nian.
“Hau hanoin ida ne’e kompetensia Funsaun Publika atu halo intervene ba asuntu ne’e, tanba barak liu ema uza sira nia poder hodi hanehan funsionariu sira no viola funsionariu sira nia direitu,” dehan membru KSTL, Fernandes.
