Implementasaun lei Violensia Domestika (VD) atu redus kazu violensia domestika durante ne’e la hatudu rezultadu pozitivu, no kazu violensia kontinua aumenta, e tanba ne’e oras ne’e dadaun Sekretaria Estadu Promosaun Igualidade (SEPI) servisu hamutuk ho Sosidade Sivil no Parseiru Dezenvolvementu sira hodi prepara Esbosu Asaun Nasional (EAN) ida reforsa lei VD nian, nune’e bele reduz problema kompleksu ida ne’e.
“Durante fulan lima nia laran sira prepara hela esbosu ne’e, hau hanoin katak prontug ona ami hein deit atu halo aprezentasaun ba iha Konselho Ministru hodi hetan aprovasaun, tanba ita hotu hatene violensia domestika ne’e krime publiku, ita hotu tenke kombate no estadu iha obrigasaun halo prevensaun no sosializasaun hodi hasa’e konsensia povu tomak,” hateten Sekretaria Estadu Promosaun Igualidade, Idelta Maria Rodrigues, bainhira aprezenta progresu dezenvolvimentu ba igualidade jeneru, semana kotuk (16/05), iha Sentru Konvesaun Dili.
Durante iha nia mandatu, SE Rodrigues dehan seidauk halo progresu barak maibe dezenvolvementu igualidade jeneru hatudu ona rezultadu pozitivu.
“Sei iha dificuldade oioin, hanesan falta rekursu umanu, no konesementu kona ba asuntu jeneru maibe diak ona tanba minsiteriu balun hanesan ministeriu saúde konsege redus numeru fertilidade no mortalidade, e progresu ne’ebe pozitive mak ministerio edukasaun deklara Timor-Leste livre husi analfabetizasaun, nune’e mos halo ona mudansa ba trabalho jeneru sira iha nivel nasional no distrital, hodi bele halo influensia diak liu ba asuntu jeneru iha ministerial, tanba lidera husi diretor jeral sira no sekretario distrital sira,” informa SE Rodrigues.
Iha parte seluk Prezidente Board Rede Feto, Ivete Oliveira rekonese katak, iha duni progresu balun ne’ebe SEPI halo hanesan politika gender mainstreaming, tanba kada ministerial promove duni feto no fo duni benifisiario ba feto, maibe iha buat barak mak governu presiza tau matan.
“Implementasaun lei trabalhadores tenke hanesan ba feto isin rua sira atu hetan orsamentu nafatin bainhira foti cuti maternidade, fo salario ne’ebe hanesan ho mane sira,” sujere Prezidente Board Rede Feto,Oliveira.
Nia espera katak iha future, SEPI bele hametin liu tan linha kordenasaun ho Sosiedade Sivil sira, nune’e servisu kombate viloensia domestika no asuntu jeneru bele la’o ho diak.
Iha lidun seluk Vise Prezidente Parlamentu Nasional, Vicente Guterres dehan, progresu ne’ebe SEPI halao ona durante tinan lima nia laran, sai hanesan fondase ida ba governu foun hodi bele kontinua promove ba futuru.
