Tuir fiskalizasaun Komisaun F Parlamentar ne’ebe hala’o durante ne’e kona ba asuntu saúde iha teritorio tomak, alende falta fasilidade iha mos keixas barak husi komunidade kona ba etika parteiras balun fo asistensia ba inan isin rua no inan partus sira ne’ebe la ho aten brani (kasar)
“Ita hare sira nia atitude simu ita nia inan feto sira mak seidauk iha etika profesionalismu, iha balun simu la ho aten brani, iha balun mos simu ho diak maibe buat sira ne’e presiza hadia tanba sira sei fraku,” tenik Deputadu Francisco de Araújo, semana kotuk (08/05), iha Parlamentu Nasional.
Tanba ne’e tuir nia, parteiras sira presiza tuir tan formasaun kona ba etika profesionalismu nian ne’ebe diak ho nasaun vizinho sira hanesan (Indonesia), atu hasae sira nia kapasidade parteira sira nian. “Nune’e bele fo asistensia ne’ebe diak no masimu ba inan isin rua sira hodi bele salva vida khosok oan sira iha rai doben ida ne’e,” Deputadu ne’e sujere.
Iha parte seluk Parteira husi Sentru Saude Bairo Formosa (SSBF), Fatima Boavida hateten, la’os parteiras hotu iha Timor-Leste iha hahalok hanesan, maibe ida rua deit.
“Ami hotu iha aten brani fo asistensia ne’ebe masimu ba inan isin rua sira no inan partus sira liu-liu iha Sentru Saúde Bairo Formosa, tanba ami hotu hetan diploma iha tempu Indonezia ami hatene katak, ami iha kapasidade atu fo asistensia ba inan isin rua sira, se liu ami nia kapasidade ami halo rujukan ba ospital bo’ot,” dehan Parteira Boavida.
Nia hatutan, kada loron sira simu inan isin rua hamutuk 30 ou 40, e inan sira ne’e mai husi bairo hotu iha Dili laran tomak, maske lolos labele atende husi bairo seluk.
“Ba inan isin rua sira ne’ebe la’os husi Sub-distritu Nain feto, ami fo konselho ba sira hodi kontinua konsulta iha Sentru Saúde ne’ebe tama iha sira nia hela fatin,” katak Parteiras ne’e.
Iha mos dificuldade ne’ebe sira hasoru durante ne’e mak hanesan sabun atu fase liman mak laiha tanba pesoal saúde iha kontatu direita ho pasiente entau presiza fase liman ho sabun.
