Numeru trabalhu infantile oras ne’e dadaun aumenta maske governu liu husi Ministeriu Solidaridade Sosial (MSS) fo apoiu orsamentu US$ 15 mil ba Organizasaun Forum Comunikasaun Joventude (FCJ) hodi tau matan ba labarik abandona sira, tanba governu la kria kondisaun ne’ebe diak ba povu hodi buka moris.
“Se iha dalan seluk atu sira hala’o atividade hodi hetan osan, entaun ami ho inan-aman sira inklui lideransa komunitaria sira bele taka fatin sira ne’e (Kaikoli) maibe se governu la kria kondisaun hau hanoin defisil,” dehan Diretor FCJ, Cipriano Freitas de Oliveira, semana kotuk (04/05) iha Balide, Dili.
Diretor de Oliveira afirma, FCJ esforsu maka’as atu redus liu husi kria atividade desportu seminal, ba labarik sira atu sira bele haluha atividade lor-loron hanesan fase kareta, maibe labele tanba defisil.
Tuir nia, tempu ne’ebe MSS fo ba sira atu tau matan ba labarik sira ne’ebe fase kareta iha estrada ibun, durante fulan neen, la sufsiente e husu atu prolonga tan tempu.
Tuir dadus ne’ebe FCJ iha, tinan 2011 total labarik ne’ebe tama lista FCJ hamutuk 105, kompostu husi kategoria trabalho infantil hamutuk 60, vitima violasaun seksual nain 1, insestu nain 1, trafiku 1, violensia domestika nain 5, separasaun familia nain 3, abandona 30 inklui mos konflitu ho lei nain 8.
Iha parte seluk Xefe Departamentu Protesaun Labarik iha MSS, Florencio Gonzaga dehan, nia parte seidauk bele fo komentariu kona ba asuntu ne’e, tanba ministeriu rasik seidauk simu rezultadu husi sira nia atividade.
“Hau hanoin atu supporta familia sira dalan barak lahalimar, tanba programa importante ida mak governu liu husi Diresaun Nasional Reinsersaun Sosial (DNRS) kria bolsa da ma’e, se inan-aman sente katak tama iha kategoria bolsa da ma’e bele registu iha lideransa komunitaria sira hodi bele supporta oan sira ba eskola, maibe ita laiha osan atu fo direitamente,” dehan Xefe Gonzaga.
Nia hatutan, atu redus numeru trabalhu infantile sira ne’ebe iha, presiza konsiensian husi komunidade no familia sira, katak servisu ne’ebe involve labarik hanesan fase kareta, hili lexu no faan sasan ne’e perigozu ba labarik.
