Lista Kandidatura husi Partidus Politiku (Parpol) sira ne’ebe hatama iha Comisaun Nasional ba Eleisaun (CNE), ba Eleisaun Parlamentar nian, maioria Parpol sira iha sensitive liu ba feto sira hodi tau feto iha numeru ne’ebe importante.
“Ami nia koligasaun mak hatama feto barak liu, tanba iha ema nain 90 kompostu husi 44 feto no 46 mane, ami nia lista numeru um mane, segundu feto, terseiru mane, kuatru feto, se ami hetan kadeira hat signifika katak feto rua mane rua mak tur,” hateten Prezidente Partidu Klibur Oan Timor Aswa’in (KOTA), Deputadu Manuel Tilman, semana kotuk (14/05), iha Uma Fukun, Dili.
Prezidente Tilman dehan, Partidu KOTA halo koligasaun ho Partidu Trabalista, e feto sira ne’ebe tama iha lista kandidatura ne’e, selesaun husi nasional no distrital.
Iha oportunidade hanesan Deputada Josefa Alvares Soares, husi Partidu Fretilin katak maske lei eleitoral fo dalan ba feto atu tama iha lista kandidatura, maibe depende mos ba sira nia kapasidade.
“Ita hare politika ne’e kompetisaun entre kandidatu sira atu bele iha numeru um to’o tres okupa hotu husi feto ne’e seidauk bele tanba ita hare sei iha kompetisaun maka’as tebes husi mane ne’e realidade ne’ebe iha feto tenke servisu maka’as no involve ativu iha partidu politikus no kompriende programa partidu nian ho razaun lista kandidatura mai husi partidu politikus,” dehan Deputada Soares.
Nia hatutan, iha partidu Fretilin rasik ba eleisaun agora, deputada ne’ebe ativu iha parlamentar agora sei la tama tan iha lista.
“Deputada na’in tolu sai, atu fo fatin ba feto maluk sira seluk ne’ebe husi distritus hodi kandata sira nian an tur iha parlamentu nasional.
Iha parte seluk Deputadu Riak Leman, husi Partidu Sosial Demokrata (PSD) hateten, sira nia lista kandidatura ba eleisaun parlamentar bazeia ba lei eleitoral ne’ebe aprova katak mane rua feto ida.
“Ami nia partidu feto tur iha numeru dois, ami fo liu ba kandidatu sira husi distritu, sira mos tur iha numeru ki’ik tanba bazeia ba esforsu ne’ebe sira halo iha distritu liu-liu estrutura ne’ebe metin ami tau tuir ida ne’e, se estrutura la potente fraku ba numeru bo’ot,” dehan Deputadu Leman.
