Total kazu ne’ebe tama iha Tribunal Rekursu (TR) husi Janeiru to’o iha Abril 2012, hamutuk 26 kazus inklui kazu krimi.
“Lolos kazu 2012 nian iha deit 26, maibe sura ho kazu 2011 nian ne’ebe pendent iha 73, total thamutuk iha 99 kazus, hetan ona desizaun final iha 50, e agora falta kazu 49 mak sei pendent hela iha tribunal rekursu,” hateten Sekretaria Judisiariu TR, Maria de Fatima, semana kotuk (09/05) iha Kaikoli, Dili.
Kona ba kazu sira ne’ebe sei pendent, nia dehan juis sira sei esforsu aan, atu oinsa mak bele julga hotu kazu sira ne’e.
“Wainhira halo julgamentu juis internasional nain ida, no juis nasional nain rua, ne’e duni ho esforsu ne’ebe maka iha espera katak kazu sira ne’e bele julga hotu,” Sekretaria de Fatima esperansa.
Entertantu Deputadu Aderito Hugo hateten, kazu barak mak pendenti iha TR, tanba falta de rekursu umanu ne’ebe sei limitadu.
“Atu prepara prokurador ida no juis ida ne’ebe maka diak, ne’e presiza tempu.e juis sira ne’ebe agora iha tribunal ne’e la to’o 20 pesoas, ne’e duni iha kestaun ne’e maka ita bele komprende katak kazu barak pendenti tanba rekursu umanu,” dehan Deputadu Hugo.
Tuir nia durante ne’e husi parte governu mos fo ajudus barak iha parte justisa nian, hanesan fatin servisu iha distritu hotu-hotu, edifisiu ba prokurador sira no juis sira.
