Planu atu kria Konselhu Imprensa (Dewan Pers-Indo) ne’ebe maka hahu nia preparasaun iha inisiu tinan kotuk, agora dadaun tama ona fase prosesu sosializasaun no estabelesementu.
Tuir Diretor Centru Jornalista Investigativu Timor-Leste (CJITL), Julio Gil Guterres, katak agora dadaun prosesu orsamentu no tekniku prepara hotu onano hein atu halo sosializasaun.
“Iha fulan ne’e nia laran depois de 20 de Maiu, sei estabelese ekipa servisu ida, atu hare hahu halo sosializasaun ou halo workshop, konsultasaun ho institusaun media jornal, radio no televizaun sira, hodi husu sira nia hanoin oinsa atu forma Konselho Imprensa tuir kultura Media Timorense ninian” hateten Diretor Centru Jornalista Investigativu Timor-Leste (CJITL), Julio Gil Guterres, semana kotuk (03/05), iha National Press Centre (NPC) Fatuhada, Dili.
Nia dehan, iha 2011 liu husi apoiu Organizasaun Internasional UNESCO, konsege halibur Asosiasaun neen inklui Press Club, Asosiasaun Jornalista Timor Lorosa’e, Sindikatu, Asosiasaun Fotografer, Asosiasaun Investigativu no Asosiasaun Radio Komunidade, no Reprezentante Dewan Pers husi Indonesia, hamutuk hodi prepara estabelese Konselhu Imprensa (KI) Pers iha Timor-Leste.
Iha oportunidade hanesan Prezidente Asosiasaun Radio Komunidade Timor-Leste (ARKTL), Prezado Valentine Ximenes Menezes, hateten objetivu husi hari atu fo protesaun ba jornalista sira bainhira mosu problema ruma kontra media.
“Problema ruma iha publikasaun media nian, dewan pers sei halo’o nia knar ga funsaun atu bele fo mahon no proteze jornalista sira, atu bele servisu tuir kodigu etika jornalista nian, no mos Konselhu sei fasilita karik iha problema ruma entre jornalista ho entidade balun iha relasaun ho publikasaun media nian,” dehan Prezidente ARKTL, Menezes.
