“Ami fo treinamentu ba parseiru servisu ne’e, ho intensaun atu sira la bele rekruta staf, tuir organizasaun ida-idak nia hakarak, hanesan bolu de’it familia ka grupu, wainhira bolu deit nia impaktu mak ema lahatene
servisu, entaun organizasaun ne’e sei la hetan rezultadu servisu ne’ebe diak,” hateten Staf Caritas Australia, Maria Zulmira Alves, semana kotuk (11/04) iha Distritu Oe-Cusse.
Espera katak ho treinamentu ne’e, bele ajuda liu tan parseiru servisu sira iha future, halo rekrutamentu ho transparansia iha instituisaun ka organizasaun ida-idak.
“Ba future bele ajuda no benefesia organisasaun ida-idak, bele ajuda sira nia organizasaun la’o tuir standart, hanesan esperiensia iha Caritas Australia,” Alves esperansa.
Entertantu Tim Lider ba Standarte Protesaun, Carolino Gonsaga Marques hateten, instituisaun ida bainhira halo rekrutamentu mak la iha transparansia, ne’e kontra prinsipiu direitus umanus.
“Ne’e sei hasai seguru ba ema, hatun integridade, hasai dignidade ema nian no kontra direitus umanus no sei la hetan dame no pas iha sustentabilidade,” dehan Tim Lider Marques.
Iha sorin seluk Partispante ba treinamentu ne’e, Abilio Ena sente kontente ho treinamentu ida ne’e, tanba ajuda ona sira hatene kona ba oinsa halo rekrutamentu ba funsiiunariu foun tuir standart ne’ebe los.
