Programa Governu atu harii uma lima kada aldeia ba ema vulneravel sira iha teritoriu tomak, iha Distritu Baucau foin tama iha faze identifika fatin.
Administrador Distritu Baucau, Antonio Augusto Guterres dehan, suku rua (suku Gurusa no Abafala) iha Sub-Distritu Quelicai mak oferse sira nia rai hectares 120 ba governu local atu harii uma lima ne’e.
“La’os la halo, halo kuandu ema ne’ebe fo rai ne’e preparadu ona, halo levantamentus dadus, no levantamentu teknik,” hateten Administrador Distritu Baucau, Guterres semana kotuk (23/04) iha Tirilolo Baucau.
Tuir Administrador Guterres, prosesu halo uma lima ne’e, kada aldeia ida iha uma ida e la’os tuir bairo. “Ezemplu iha tiha ona hanesan iha Batugade uma lima ne’e halo hotu ona,”.
“Agora dadauk sira hakat ona mai liu, depois ita agora iha Bahu mos sei problema hela tanba rai seidauk identifika, Seical mos seidauk halo identifikasaun, ba Quelicai sira ba hare ona,” Administrador Guterres afirma.
Iha parte seluk Xefe Diresaun Servisu Solidariedade Sosial Distritu Baucau, Domingos Abreu Martins Belo hateten, programa hari uma lima ba ema vulneravel ne’e, la’os sira nia kompetensia maibe Administrasaun Distritu nian.
“Hau laiha informasaun barak maibe informasaun ida ne’e mak hau fo ne’e tanba informasaun kona ba uma lima ne’e hau ladun hatene klaru,” hateten Xefe Belo.
