PNTL halao halao atuasaun ba iha manifestantes no rezulta PNTL nia elementus rua kanek no trabalhadores balun numero lolos la duak konfirmadu polisia kaptura tiha.
“Atu atua situasaun para kalma kilat tarutu to’o deit dala 15, ne’ebe konaba tiru lalika tauk. Tarutu liu tan 15 mos labuat ida ami hatene hanusa par uza meius. Ema sira ne’ebe maka polisia kaer la to’o 60. Sira tenki responsabiliza,” hateten Comandante Jeral Polisia Nasional Timor-Leste (PNTL) Superintendente Longuinhos Monteriu, iha nia knar fatin foin lalais (02/05).
Tuir nia demostrasaun mos iha nia regras ne’e duni ba ema sira nebe maka halo demostrasaun tuir regras nebe maka halo tiha ona husi inisiu kedas.
“Estadu ne’e iha ninia regras. Demonstrasoens oin-oin iha nia regras, kwandu autorizasaun ida fo sai signifika katak ita hamutuk aseita ba iha regras. Ida displina iha dalan no labele impede direitu ema seluk ninian,” dehan Superintendente Monteiro.
Nia haktuir katak akuntesemnetu ne’ebe maka rezulta membru polisia nain rua kanek ne’e tanba iha konfrontasaun ema balu tuda vidru Hotel Timor.
“Iha asaun ida ke provokativu liu ona sai ona ultrapassa ona medidas ne’ebe maka ita konkorda malu iha inisiu de autorizasaun ne’ebe maka polisia fo. Tuda ona hotel nia vidru rahun ne’e fora ona husi kestaun e polisia tenki foti medidas. Polisia fo tempu para sira atu sai husi fatin ne’e sira ataka fali polisia halo hau nia membru nain rua kanek,” dehan nia.
PNTL kaer tiha ona ema suspeitu balun ne’ebe ataka membrus polisia no oras ne’e sira nia kazu tama ona iha Polisia Distrital Dili atu submete ba iha prosessu investigasaun.
Entertantu Deputado Jose Teixera, Komisaun B, hateten tuir lolos atitude ne’e labele akuntese hensan ne’e.
“Hau laiha neba maibe hau rona informasaun deit. Ne’e duni hau nia hanoin prezensa polisia sira iha ne’eba buka atu kontrola deit situasaun. No situsaun ne’ebe maka mosu no atusaun nebe maka husi polisia fo ne’e mos tuir sira nia knar no sira halo los. Maibe ami mos atu buka mos dadus,” hateten Deputado Teixeira.
Nia apelu katak ema sira ne’ebe maka polisia sira kaer ne’e tenki prosesu ho responsabilidade no tribunal deit maka bele deside ida nebe maka los no sala.
