Administrador Sub-Distritu Quelicai, Lino F. Moreira Freitas hateten nia komunidade sira la asesu ba bee moos tanba kanu ne’ebe halo kanalizasaun husi bee matan mai iha komunidade sira fruzu hotu ona.
“Sira tenki la’o ain kuaze kilomentru rua hanesan ne’e, atu hetan bee, e la’os povu deit maibe iha ami nia servisu fatin mos bee la iha,” informa Administrador Sub-distritu Freitas, semana kotuk (12/04) iha nia hela fatin Tirilolo, Baucau.
Tuir nia, kestaun ne’e hato’o dalabarak ona ba iha Servisu Agua no Saneamentu (SAS), maibe to’o agora laiha rezultadu.
Entretantu Komunidade Agustinho dos Santos, senti triste tanba kanu nebe dada husi bee matan ba povu iha Quelicai Vila fruzu hotu e seidauk hadia to’o agora.
“Hau husu ba SAS atu hadia kanu ne’ebe mak oras ne’e aat ona, tanba bee ba ami komunidade iha Quelicai Vila la sai ona, ami tenki la’o ain atu hetan bee moos kuaze kilomentu 2 ka tolu hanesan ne’e,” dehan Komunidade dos Santos ho triste.
Nune’e mos Estudante Domingos Ximenes, senti triste tanba dader atu ba eskola tenki buka bee iha fatin do’ok mak foin haris, dala ruma to’o iha eskola tarde.
“Ami estudante senti triste, tanba ami dader atu ba eskola tenki kuru bee iha fatin do’ok mak foin haris , ami la hetan bee moos, bee ne’ebe mak ami hetan dala ruma laiha kualidade ka la iha higiene,” dehan Estudante Ximenes.
