Ministru Saúde (MS), Nelson Martins ho ekipa ida en nome governu Timor-Leste (TL) sei vizita hodi hare direitamente kondisaun Jornalista Max Stahl ne’ebe oras ne’e baixa hela iha Ospital Englatera tanba moras kankru.
Jornalista Max Stahl, nudar kompaneiru da luta ne’ebe fo kontribuisaun maka’as ba nasaun TL, liu-liu halo filmajen kona ba masakre 12 Novembru 1991 iha Santa Crus Dili, ne’ebe halo joventude lubun ida mate tanba hahalok brutal husi military Indonezia, e liu husi filmajen ne’e, loke mundu internasional nia matan kona ba violasaun direitus humanus iha Timor.
Vizita Ministru Martins ho ekipa ne’e hanesan envoi especial governu nian deside liu husi enkontru Konselhu Ministru (11 Abril), ne’ebe sei aranka ba iha Englatera iha 27 Abril agora, alende hare kondisaun Jornalista Shtall, Ministru mos sei koalia ho mediku sira iha ne’eba, atu governu TL bele apoiu buat ruma, tanba nia (Max Stahl) ema ne’ebe importante ba nasauun ne’e.
“Husu ba joventude eis 12 Novembru no povu Timor-Leste hotu, atu reza ba ita nia kompaneiru da luta Max Stahl bele hetan saúde diak fali hodi hamutuk ho ita,” husu Ministru Martins, semana kotuk (15/04) iha salaun Institutu Nasional Saúde (INS) Comoro, Dili.
Ministru Saude rasik seidauk hatene klaru kondisaun Jornalista Shtall ne’ebe moras ne’e, tanba seidauk hetan relatoriu ruma husi ospital London nian ne’ebe nia baixa ba.
“Hau simu email husi Max Sthall nia kaben, nudar kolega mediku katak moras iha kakorok maibe ita seidauk rona los, ne’eduni ami sei ba vizita rasik iha London hodi hato’o apresu bo’ot husi Primeiru Ministru ho nia membru governu tomak no estado Timor-Leste ba senhor Max,” Ministru Martins katak.
Iha parte seluk Komunidade Jose da Conceição da Costa, hateten Max Stahl ema estranjeiru ida ne’ebe interese duni ba luta indepedensia Timor-Leste nian liu husi nia profisaun nudar jornalista ida ne’ebe halo nia servisu ho professional.
“Hau hanoin ida ne’e inisiativa ne’ebe diak teb-tebes, no hatudu katak ita nia estadu rekonese duni kontribuisaun ne’ebe Max halo durante luta ba indepedensia Timor-Leste,” dehan Komunidade da Costa.
Alende ne’e, nia mos fahe esperiensia jornalista nian ba jornalista Timor oan sira, oinsa atu sai professional liu tan iha area komunikasaun sosial.
